Х.Ариунаа: Иргэдийн амь насыг Ерөнхийлөгч, Ерөнхий Сайд, бусад дарга аврахгүй ээ, ЭМЧ нар л аварна

Эрүүл мэндийн ажилтны ҮЭХ-ноос ХӨСҮТ-ийн эмч нар PCR шинжилгээг хуурамчаар үйлддэг үү? гэсэн асуудал дээр хэвлэлийн хурал хийж, Коронавирусийн цар тахлын үед ажиллаж байгаа эмч нарын нөхцөл байдлын байдлаар мэдээлэл хийлээ. Уг хуралд PCR шинжилгээг хуурамчаар үйлддэг гэж нэр цохогдоод байгаа эмч нарын төлөөлөл оролцсон юм.

Эрүүл мэндийн ажилтны үйлдвэрчний эвлэлийн холбооны дарга Х.Ариунаа: Сонгуулийг хойшлуулсан ч яадаг юм, Монгол хүний амь нас нэг дүгээрт байна

Цар тахлын үеэр ажил албаа гүйцэтгэж яваа эрүүл мэндийн салбарынханы нөхцөл байдал маш хүнд байна. Өөрийн биеэ хайхрахгүй, хоёргүй сэтгэлээр зүтгэж байгаа эмч, эмнэлгийн ажилчид маань өөрсдөө өвддөггүй хүмүүс биш шүү дээ.
Жишээ нь, Нэг хаалга- нэг шинжилгээгээр хаврын хавсаргад явсан эрүүл мэндийн салбарынхан дотуураа нимгэн хувцас дээр хамгаалалтын хувцас өмсөөд явахад Нуруунаас хөлрөөд, хайраад бид нар өөрсдөө өвдчихлөө гээд ирж байсан. 

Хөл хорио тогтоочихсон, гадуур ямар ч хоолны газар байхгүй, ихэнх эмнэлэг хоолны газаргүй, энэ хүмүүс хоол ундаа идэхгүйгээр өдөржин хамгаалалтын хувцсаа нэг л өмссөн тайлахгүй, өөрсдөө өвчин авчихна, гэр орныхондоо, хүүхэд, хань ижилдээ халдвар дамжуулчихна гээд өдөржин хоосон гүйж байгаад орой ажлаа тарахад л нэг хамгаалалтын хувцсаа тайлж, хоол ундаа идэж байна. Бодит байдал ийм л байна.

Монголын гурван сая хоёр зуун мянган хүний амь насыг хамгаалах ажлыг Ерөнхийлөгч хийхгүй ээ, Ерөнхий Сайд хийхгүй, салбарын сайд дарга нар хийхгүй, аврахгүй. Өнөөдөр эрүүл мэндийн салбарын ажилчид л амийг нь аварна. Үүнд та нар итгээрэй, ард түмэн минь эрүүл мэндийн салбарынханд баяр талархал илэрхийлж чаддаггүй юм аа гэхэд битгий элдэв үгээр хэлээч, амгалан тайван ажлыг нь хийлгэх нөхцөлөөр хангаж өгөөч гэдгийг холбооныхоо нэрийн өмнөөс уриалж байна.

Төрийн түшээд маань салбарынхаа мэргэжлийн хүмүүсийн үгийг, саналыг сонсдог байх хэрэгтэй. Бидэн дунд эрдэмтэн, докторууд байна, олон жилийн туршлагатай мэргэшсэн боловсон хүчнүүд байна. Яагаад энэ хүмүүсийнхээ үгийг сонсохгүй байгаа юм бэ? Өнөөдөр бидэнд сонгууль чухал биш ээ, сонгуулийг хойшлуулсан ч яадаг юм. Монгол хүний амь нас нэг дүгээрт байна.
Эрүүл Мэндийн Яамны сайд аа та, салбарынхныхаа нэр хүндийг сэргээх, цалин хөлсний асуудал дээр УОК-ын даалгаврыг үг дуугүй биелүүлэх биш, энэ салбарынхаа дуу хоолойг эхлээд сонсооч. Эндээс гарч байгаа саналыг цаашаа уламжилж ахиц гаргаж хурдтай байгаач ээ гэдгийг шаардаж байна. хэмээсэн юм.