Ж.Эрдэнэбатыг гэм буруутайд тооцон, яллах шүүх хуралдааныг хойшлууллаа

2020 оны 07 сарын 03

УИХ-ын гишүүн, Ерөнхий сайд асан Ж.Эрдэнэбатыг гэм буруутайд тооцон, яллах шүүх хуралдааныг  долдугаар сарын 9-нд товлов. 
Нийслэлийн прокурорын газраас шүүгдэгч Ж.Эрдэнэбат, Б.Отгонбаатар, Д.Ганбат, Д.Түвшинжаргал, С.Мандахбат нарт холбогдуулан яллах дүгнэлт үйлдэж ирүүлсэн эрүүгийн хэргийг тус дүүргийн шүүх 2020.05.15-ны өдөр хүлээн авсан.

С.Мандахбатад холбогдох хэргийг хэрэгсэхгүй болгож, шүүгдэгч Ж.Эрдэнэбат, Б.Отгонбаатар, Д.Ганбат, Д.Түвшинжаргал нарыг тухайн хэрэгт гэм буруутайд тооцон ял оногдуулах шүүх хуралдааныг 2020 оны 7дугаар сарын 9-ний өдөр товлов. 
Шүүгдэгч Ж.Эрдэнэбат нарын таван хүнд холбогдох эрүүгийн шүүх хуралдаан өчигдөр буюу 2020.07.02-ны өдрийн 11:00 цагт эхэлж хоёр өдөр дарааллан Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд хуралдсаны эцэст шүүхийн шийдвэр гарав. 
Шүүгдэгч Ж.Эрдэнэбатын гаргасан хүсэлтийн дагуу түүнийг хуульд заасан өмгөөлүүлэх эрхээр нь хангах үүднээс өмнө нь шүүх хуралдаан хоёр удаа хойшилсон боловч энэ шүүх хуралдаанд дахин шинээр өмгөөлөгч авч, өмгөөлөгч нь хэргийн материалтай танилцахаар  шүүх хуралдааныг 14 хоногоор хойшлуулах тухай хүсэлт гаргаж байгаа нь шүүн таслах ажиллагаанд санаатайгаар саад учруулж байна гэж үзэх үндэслэлтэй байх тул шүүх хуралдааныг хойшлуулах боломжгүй гэж шүүх үзсэн.
Шүүгч энэ тухай захирамжийг танилцуулсны дараа шүүгдэгч Ж.Эрдэнэбатын өмгөөлөгч Д.Батсүх шүүгдэгчийг өмгөөлөх боломжгүй нөхцөл байдал үүссэн учир шүүгдэгчийг өмгөөлөхөөс татгалзаж байна гэж шүүх хуралдааны танхимыг орхиж гарсан ба шүүгдэгч Ж.Эрдэнэбат нь өмгөөлөгч Д.Батсүхээс татгалзаж, шүүх хуралдаан даргалагч Х.Идэр шүүгчээс татгалзах тухай хүсэлт гаргасан юм. 

Т.Номин 

Сэтгэгдэл (0)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.