ЗГХЭГ-ын дарга Д.Амарбаясгалантай холбоотой мэдээлэл гаднын сайтад нийтлэгджээ

Мэдээллийн Yahoo.com цахим хуудаст өнөө өглөө Монгол Улсын сайд, ЗГХЭГ-ын дарга Д.Амарбаясгалангийн тухай “Дашзэвэгийн Амарбаясгалангийн Зөвлөлт маягийн авлига Монголыг тогтворгүй болгож байна” гэсэн нийтлэл гарчээ. Адам Балогн гэгчийн бичсэн "Маш ноцтой" гэж хэлж болох гарчигтай тус нийтлэлийн эхэнд Монгол Улс “Баялгийн хараал” тусаж, “Нүүрсний хулгай” нүүрлэсэн, улмаар Ерөнхий сайд Л.Оюун-Эрдэнэ энэ хулгайг илрүүлэхээр албан тушаалтнуудтай тэмцэл өрнүүлж байгааг дурдаад, Хэрэг эрхлэх газрынх нь дарга энэ хэрэгт холбоотой гэх сэжүүрүүдийг хөвөрдсөн байв.

НИЙТЛЭЛД ДУРДАГДСАН НОЦТОЙ АГУУЛГУУД

Гаднын сэтгүүлч Монголын нөхцөл байдлыг судлаад бичээд байх нь ховор. Тэгвэл Адам Балогн хэмээх сэтгүүлч нээлттэй эх сурвалжаас багагүй мэдээлэл цуглуулж, тэр ч байтугай дүгнэлт хийсэн байв. Тухайлбал, "Нүүрсний хулгай"-н хэргийг шалгахад тодорхой албан тушаалтнуудын зүгээс саад тотгор учруулж байгаа. Тэдний нэгийг ЗГХЭГ-ын дарга Д.Амарбаясгалан гэжээ. Мөн Тавантолгойд нүүрс баяжуулах үйлдвэр барьж байгаа "Админерал" ХХК, тус компанийн санхүүтэй холбоотой баримтуудыг дэлгэж, далд эзнийг Д.Амарбаясгалан гэж дүгнэсэн байна.

Адам Балогны нийтлэлд дурдагдсан бас нэг ноцтой агуулга нь Засгийн газраас барьж байгуулахаар зэхэж буй хагас коксын үйлдвэрийг Д.Амарбаясгалангийн хамаарал бүхий компани барих тухай байна.

Нийтлэлч энэ талаар “Цэвэршүүлсэн нүүрсний чанарыг сайжруулах, бохирдлыг бууруулах нь олон нийтийн эрх ашигт нийцэж байгаа ч эрх баригч намын Засгийн газрын хэрэг эрхлэх газрын даргын хамаарал бүхий компани энэ ажлыг яагаад хийх болсон нь тодорхойгүй байна” гэж бичжээ.

Улмаар нийтлэлээ “Админерал” ХХК, “Глобал гүүр транс” ХХК нь Монголын ардчиллын бүрэн бүтэн байдалд заналхийлж байна. Нүүрсний хэрэгт Засгийн газрын хүн оролцсон нь эрх баригч намыг хагалах ч магадлалтай.

Хэрэв Ерөнхий сайд Л.Оюун-Эрдэнэ өөрийн намын гишүүдийн үүсгэсэн улс төрийн тогтворгүй байдлыг даван туулж, ил тод байдлыг бий болгож, ял шийтгэл ногдуулах ажлыг үргэлжлүүлэх юм бол Монгол Улсад хөрөнгө оруулагчдад таатай орчин бүрдэнэ.

Монгол Улсын хөгжил цэцэглэлтийн төлөөх тэмцэлд хэн ялах вэ. Үндэсний эрх ашгийн төлөө тэмцэж буй Засгийн газар уу, эсвэл амин хувиа борлуулсан авлигач албан тушаалтнууд уу гэдгийг харах л үлдлээ. Монголын ирээдүй эгзэгтэй байна” хэмээн дуусгажээ.  

/Нийтлэлийн линк: https://finance.yahoo.com/news.../