“Макс”-ын хэмээх Д.Ганбаатар Говь-Алтайн ИТХ-ын төлөөлөгчдийг АНУ-д зугаалуулжээ

“Макс групп”-ын эзэн Д.Ганбаатар Говь Алтай аймгийн ИТХ-ын төлөөлөгчдийг АНУ-д зугаалуулжээ. Хэчнээн хүнийг авч явсан нь тодорхойгүй, гэхдээ ямартай ч ИТХ дахь Ардчилсан намын талын 21 хүнийг авч явсан гэсэн мэдээлэл байна.

Олдоц элбэгээрээ дуулиан тарьж, монголчуудыг хуйлруулж байсан алдарт Бигэрийн алтны ордыг ил, далд арга хэрэглэн өөрийн болгож байсан, тэндээс олсон ашгийнхаа “хорыг нь гаргахын тулд” л Говь-Алтай-Баянхонгорыг холбосон хатуу хучилттай зам барьсан гэгддэг Д.Ганбаатар аймгийнхаа дарга, удирдлагуудад ийнхүү бийлэгжүү хандаж байгаад ямар нэгэн учир байна гэж нутгийнхан хардаж байгаа аж.

Учир нь, айлын өвөлжөөний үнс асгадаг газрын ойролцоо анх илэрч, алтны “нинжа” нар ухаж байсан Бигэрийн алтны ордыг “Макс” групп тухайн үеийн Говь Алтай аймгийн ИТХ-аар шийдвэр гаргуулан өөрийн болгосон бөгөөд Говь-Алтай, Увсын 1000 шахам цагдааг дайчлан бараг дээрэмдэж авсан. Харамсалтай нь, Монгол даяар дуулиан тарьж байсан энэ баялаг орд Бигэр сум, нутгийн иргэдэд наалдсан нь бага, харин шийдвэр гаргасан ИТХ-ын төлөөлөгчид үүнээс хойш юмжиж, хот, хөдөөд үл хөдлөх хөрөнгөтэй болсон байдаг. Тиймээс “Макс” группын эзэн ИТХ-ын төлөөлөгчдийг гадаадад аялуулж байна гэдэг нутгийн хөгжилд ашиггүй, Д.Ганбаатар болон ИТХ-ын гишүүн дарга нарт ашигтай ямар нэг юм болох гэж байгаа буюу болоод өнгөрсөн гэж хардах нь зүй ёсных биз.

Д.Ганбаатар нь Бигэрийн алтыг ухаж дууссаныхаа дараа “Хан Алтай ресурс” компаниараа Есөнбулаг сумын нутагт орших “Хан Алтай” алтны үндсэн ордыг 2022 оноос ашиглаж эхэлсэн. “Хан Алтай” бол 85.4 тонн алтны нөөцтэй, шууд хэлэхэд Стартегийн ач холбогдолтой орд. Стратегийн орд болох Бороогийн алтны ордыг хоёрыг нийлүүлснээс ч илүү нөөц тогтоогдсон уг ордыг төр анхааралдаа авахад гэмгүй.

Говь-Алтай аймаг бол газрын тогтцын хувьд Өмнөговийн алт, зэсийн том ордууд агуулсан давхаргын шууд үргэлжлэл, ирээдүйд тогтоогдох нөөцөөрөө “Монголын үүц” гэж нэрлэгдэх бүрэн боломжтой нутаг. Одоо ч “Макс” группын “Хан Алтай ресурс”, “Маркополо”, Мандал Алтай, “Алтайн хүдэр” зэрэг том компаниуд үйл ажиллагаа явуулж, алт, төмрийн хүдрийг өдөрт хэдэн мянган тонноор нь олборлодог.

Гэвч орон нутаг нь хөгждөггүй. Өрсөлдөх чадварын үнэлгээгээр аймгуудаас сүүл мушгидаг. Дарга удирдлагууд нь өөдгүй. Иргэдийнхээ мэдлэг, мэдээлэлгүй байдлыг ашиглаж, замаас нь мөнгө завшсан хамгийн ёс суртахуунгүй хэргүүд эндээс л дуулддаг.

Бид өчигдөр Говь Алтай аймгийн Засаг дарга Г.Чинбат нь орон нутагт уул уурхайг байгаль орчин, хүн ардад ээлтэй хөгжүүлэх үүрэг бүхий зөвлөлийг байгуулахдаа холбогдох хууль, тогтоолыг зөрчсөн талаар мэдээлсэн. Түүнд аймаг орон нутаг уул уурхайн компаниудтай нийгмийн хариуцлага хэрэгжүүлэх 64 гэрээ байгуулснаас 20-ийг нь ил тод байршуулж, 44 гэрээг ил тод болгоогүй нь хардлага дагуулж байгаа талаар дурдагдсан бол энэ удаад аймагт үйл ажиллагаа явуулдаг ААН төрийн байгууллагын дарга нарыг авлигын шинжтэйгээр гадаадад аялуулсан талаарх мэдээллийг хүргэлээ /Зураг: Зүүн гар талаас Г.Чинбат, Д.Ганбаатар нар/. Говь Алтай аймаг хөгждөггүйн шалтгаан энэ мэт, дарга нарын дураараа үйлдэл, аялал зугаалгын цаад нөлөө байдаг ч байж болох юм.