Яллагдагчаар татах цагдаагийн саналыг Прокурор дарах уу

Эрдэнэтийн 49 хувийг төрийн мөнгөөр хууль бусаар хувьчилж авсан гэх үндэслэлээр  Худалдаа хөгжлийн банкны ТУЗ-ийн дарга Д.Эрдэнэбилэг нарын дөрвөн хүнийг ЭЦА-ны Эдийн засгийн гэмт хэрэгтэй тэмцэх газрын ажилтнууд, ЦЕГ-ын Тусгай ажиллагааны газрын алба хаагчдын тусламжтайгаар саатуулан баривчилснаас хойш бараг 7 хоноод байна. Ц.Элбэгдорж хууль хяналтын нөлөө бүхий хүмүүс руу утасдан дарамт шахалт үзүүлэн нөлөөлөхийг оролдож буй талаар ЗГХЭГ-ын дарга Л.Оюун-Эрдэнэ мэдэгдэж байсан.

Гэтэл үүнийг баталсан мэт саатуулсны маргааш өглөө л тэднийг шүүхийн зөвшөөрөлгүйгээр баривчилсан хэмээн суллаж байсан. Харин цагдаагийн эх сурвалжийн мэдээлснээр тэднийг яллагдагчаар тооцон шалгах прокурорын тогтоолтой танилцуулахын тулд 3-4 удаа зарлан дуудах хуудас өгсөн ч ирээгүй тул ийнхүү албадан авчирч яллагдагчаар татах тогтоолтой нь танилцуулжээ. Гэвч цагдаагаас өгсөн яллагдагчаар татах саналыг Нийслэлийн прокурорт явуулснаас хойш өнөөдрийг хүртэл ямар ч сураггүй болжээ.

Тэднийг суллах шүүхийн шийдвэрийг Ерөнхийлөгч асан Ц.Элбэгдоржийн нөлөөтэйгөөр гаргасан гэсэн хардлага эхнээсээ батлагдаж буй.  Харин энэ удаад нийслэлийн Прокурорт мөн л хэн нэгэн нөлөөлж буйгаас “Эрдэнэт 49%”- ийн хэрэгт холбогдсон дөрвийг яллагдагчаар татах санал Прокурор дээр гацжээ гэсэн хардлага тарж эхлээд байна. 
Дашрамд сонирхуулахад Монгол Улсын Ерөнхийлөгчийн зарлигаар шүүгч, прокурорыг томилдог ажээ.