Э.Номин-Эрдэнийн эгч: Манай дүү "амьдрах хүсэлгүй байна, би буруугүй байсан ч тэр шоронд нь ормоор байна" гэж байсан

Бусдын гарт хэрцгийгээр амь насаа алдсан 16 настай охины хэрэг олны анхаарлыг татаад байна.

Хохирогч охины ээжийн цахим орчинд цацсан зурагтай холбогдуулан Э.Номин-Эрдэнэ гэх охины эгч Э.Оюун-эрдэнэ манай сайтад хандан мэдээлэл өглөө. 

-Та ямар шалтгаанаар манай сайтад хандан мэдээлэл өгөхөөр болов?

-Талийгаач охины ээж хэрэгтэй холбоотой зураг цацсанаас үүдэж нийгэмд буруу ойлголт төрүүлээд байна. Энэ тал дээр л өөртөө байгаа үнэн зөв мэдээллийг ярих гэсэн юм.

-Хохирогчийн ээжийн цацсан зураг дээр танай дүү Э.Номин-Эрдэнэ хөлөө ачаад суучихсан, Э.Ган-Эрдэнэ гэх залуу цаана нь юм уугаад сууж байгаа харагдсан. Та үүн дээр ямар тайлбар өгөх вэ? Танай дүү Э.Ган-Эрдэнэ болон алуурчин гэгдээд буй Ц.Дагвадоржийг яаж таньдаг юм?

-Манай дүү энэ хэргийн талаар эхлээд биднээс нуусан байсан. Айсан байх л даа. Гэхдээ тэр зураг харагдаж байгаа шигээ биш. Тэр хүн алсан гээд байгаа Ц.Дагвадорж Э.Ган-Эрдэнэ болон Э.Номин-Эрдэнэ буюу манай дүүг айлган сүрдүүлсэн байсан.

Ц.Дагвадорж сошиалаар л манай дүүтэй танилцсан юм шиг байна лээ. Харин тэр Э.Ган-Эрдэнэ гэх залуутай хэрэг гарахын өмнөх өдөр танилцсан. Тэр залуу зүгээр л таксинд явдаг залуу гэж хэлсэн. Тэгээд л Э.Ган-Эрдэнэ Э.Номин-Эрдэнэ хоёр талийгаач болон хэрэгтэн гээд байгаа Ц.Дагвадорж дээр очсон юм билээ.

-Тухайн өдөр юу болсон талаар дүү чинь өөрт чинь ярьж байсан уу?

-Ярьсан. Гэхдээ би хэргийн талаар нарийн ширийн зүйл ярьж болохгүй байх. Гэхдээ тэр Ц.Дагвадорж зурган дээр гарч байгаа хоёр хүүхдийг сүрдүүлээд зургийг нь авсан байсан.

-Юу гэж сүрдүүлсэн юм?

-Тэр цэнхэр чемоданд гар буу байгаа би та хоёрыг буудна шүү гэсэн байсан. Тэр хоёр арга ядаад л тэгж тайван байгаа юм шиг сууж бичлэг хийлгэсэн гэсэн. Бүр манай дүүг Э.Ган-Эрдэнийг бууд гэж сүрдүүлсэн байсан. Хэрэг гардаг өдөр Ц.Дагвадорж, Э.Ган-Эрдэнэ, Э.Номин-Эрдэнэ тэгээд талийгаач охин тэр дөрөв л байсан гэж хэлсэн.

Тэр өдөр болсон бүх процессыг дүү маань ярьж өгсөн. Гэхдээ би илүү дэлгэрэнгүй ярьж болохгүй байх.

-Танай талаас шүүх хуралд есөн өмгөөлөгчтэй оролцох нь үнэн юм уу?

-Үгүй ээ. Э.Ган-Эрдэнийн талаас нэг, манай дүү Э.Номин-Эрдэнийн талаас нэг өмгөөлөгчтэй орж байгаа. Цахим орчинд яваад байгаа том ар талтай мөнгөтэй баян айл гэдэг мэдээлэл огт худал. Манай аав ээж хөдөө амьдардаг. Бидэнд шүүх хуулийн байгууллагад таньдаг ямар ч хүн байхгүй.

Манай дүү "гэмт хэрэгтэн болоогүй байсан ч үнэхээр би хоригдоод тэр ээжийн гомдол бага ч гэсэн тайлагдах бол ял авсан ч бэлэн байна. Ингэж нийгэмд алуурчин гэж тодотгуулж байхаар шоронд ормоор байна эсвэл гэм буруугүй нь тогтоогдчихвол нийгэмд адлуулж байхаар үхсэн минь дээр" гэж байсан.

Ямар ч байсан манай дүү болон тэр Э.Ган-Эрдэнэ гэх залуу хоёр эцсээ хүртэл талийгаач охиныг хамгаалах гэж оролдсон гэсэн. Гэхдээ чадаагүй. Тийм болохоор энэ хэргийг хууль шүүх нь үнэн зөвөөр шийдээсэй гэж хүсэж байна. Бид ч ялгаагүй хүмүүстэй адилхан л бодолтой байгаа" гэлээ.