Ү.Амарбат: Б.Энхбаяр хуурамч ордер үйлдэж, БЗС-аас зээл авсан байж болзошгүй

Өмгөөлөгч Ү.Амарбатаас улс төрд үүсээд байгаа асуудалтай холбоотой хэргийн талаар тодруулга мэдээлэл авлаа. 

-Б.Энхбаярт иргэний хэрэг үүсгэж шүүхээс бичиг гарсан гэх мэдээлэл бий. Энэ хүн шүүхээс бичгээ хүлээж авсан болов уу? 

-Гэрийнх хаягаар очоод өгөх гэсэн боловч эхний хаяг дээрээ байгаагүй юм байна л даа.  Нэхэмжлэхээ гардаж аваад, хүний нэр төрд халдаад байгаа үйлдэлдээ шүүхийнхээ журмаар хандаач ээ гэж хэлмээр байна. 

Энэ хүн бол баталгаатай ард талтай байна. Өөртөө итгэлтэй байна. Хэн ч энэ хүнийг зогсоохгүй гэдэгт итгэлтэй байх шиг байна. 

Би Б.Энхбаярын мэдээлэл дэлгэдэг шиг тэр хүний хэлдэг шиг хэдэн зүйл хэлье. 

Энэ хүн анх БЗС-аас зээл авахдаа өөрийн төрсөн ахынхаа нэр дээр байдаг ордерийг нэрийг нь засаж байгаад хуурамч байрны ордер бүрдүүлж зээл авсан байж болзошгүй байна. 

Мөн БЗС-аас хоёр жил дараалж зээл авахдаа сургууль руугаа биш өөрийн хувийн данс руугаа мөнгө авсан байж болзошгүй байна. Үүнийг шалгах ёстой. 

Дараа нь БЗС-ын зээлээ төлсөн байна. Тухайн үеийн хөрөнгө орлогын мэдүүлгийг үзэхэд өөрт нь ийм хэмжээний хадгаламж байгаагүй гэж хардаж байна. 

Одоо энэ хүнд зээлийн сан дээр маш их хүү алданги үүсчихсэн байгаа. Өнөөдрийг хүртэл үүнийгээ төлөөгүй байна. Энэ баримтуудыг хэвлэл мэдээлэл нягталж, хууль хяналтын байгууллага нь шалгах хэрэгтэй байна. 

Энэ асуудалтай холбогдуулан намайг шүүхэд дуудах юм бол би өөрийн биеэр очиход бэлэн байна. Өөрөө үүнийг нотлохгүй бол би үнэн гэж ойлгоно. Яагаад гэхээр Монгол Улс ийм жишиг рүү орлоо шүү дээ. Би хэвлэлээр нэг хүнийг тултал нь ярина. Араас нь тэр хүн өөрийнхөө хэргийг нотлохгүй бол үнэн гэж ойлгодог. Тиймээс тэр хүний хүсэж байгаа хэлбэрээр явъя" гэлээ.