Т.Өсөхбаярыг Улсын дээд шүүхийн шүүгчид нэр дэвшүүллээ

Улсын дээд шүүхийн шүүгчид Т.Өсөхбаярыг нэр дэвшүүлжээ. Монгол Улсын шүүхийн тухай хуулийн 36.2 дахь хэсэгт заасны дагуу Шүүхийн ерөнхий зөвлөлөөс нэр дэвшигчийг УИХ-ын Хууль зүйн байнгын хороонд танилцуулав.

Шүүхийн ерөнхий зөвлөлийн дарга П.Золзаяа "Сонгон шалгаруулалтыг хуулийн хүрээнд явуулсан. 16 хүн сонгон шалгаруулалтад материалаа ирүүлж, оролцсон. Бичгийн шалгалтад таван хүн тэнцсэн, дараагийн шатанд нэг хүн тэнцсэн нь Т.Өсөхбаяр. Сонгон шалгаруулалт явуулахаас өмнө журмыг шинэчилсэн байсан" хэмээн нэр дэвшигчийг танилцуулсан.

Дашрамд, Улсын дээд шүүхийн Ерөнхий шүүгч Д.Ганзоригийн хугацаа ирэх сарын 02-нд дуусах юм. 

Улсын дээд шүүхийн шүүгчид нэр дэвшигч Т.Өсөхбаярын танилцуулга 

• 1976 онд Сүхбаатар аймгийн Баруун-Урт суманд төрсөн, 50 настай, эрэгтэй. Ам бүл тавуулаа.
• 1984-1994 онд Сүхбаатар аймгийн нэгдүгээр бүрэн дунд сургууль,
• 1995-1999 онд “Их засаг” их сургуулийг эрхзүйч,
• 2010-2020 онд МУИС-ийн Хууль зүйн сургуульд суралцан хууль зүйн ухааны магистрын зэрэг хамгаалсан.
• 2000 онд Чингэлтэй дүүргийн шүүхэд шүүх хуралдааны нарийн бичгийн дарга,
• 2000-2001 онд Нийслэлийн шүүхэд жижүүр,
• 2001-2003 онд Сүхбаатар дүүргийн шүүхэд шүүх хуралдааны нарийн бичгийн дарга,
• 2003 онд Улсын дээд шүүхэд нийт шүүгчдийн хуралдааны зохион байгуулалтын асуудал хариуцсан шинжээч,
• 2003-2006 онд Улсын дээд шүүхэд Эрүүгийн хэргийн танхимын шүүгчийн туслах,
• 2006-2009 онд Баянзүрх дүүргийн шүүхийн шүүгч,
• 2009-2012 онд Баянгол дүүргийн шүүхийн шүүгч,
• 2012-2013 онд Нийслэлийн давж заалдах шатны шүүхийн шүүгч,
• 2013-2015 онд Эрүүгийн хэргийн давж заалдах шатны 10 дугаар шүүхийн шүүгч,
• 2015 оноос Нийслэлийн Эрүүгийн хэргийн давж заалдах шатны шүүхийн ерөнхий шүүгч, шүүгчээр ажиллаж байна.