Бага насны хүүхэд хүчиндсэн этгээдэд 13 жилийн хорих ял оноолоо

Өвөрхангай аймгийн Прокурорын газар Б гэгчийн бага насны хүүхэд хүчиндсэн гэмт хэрэгт яллах дүгнэлт үйлдэн шүүхэд шилжүүлжээ.

Хэрэгт авагдсан, шүүхийн хэлэлцүүлэгт шинжлэн судалсан баримтуудаар шүүгдэгч Б нь бага насны хохирогч Э-г хүчиндсэн болох нь нотлогдон тогтоогдсон байна.

Гэмт хэргийн хохирогч болон түүний хууль ёсны төлөөлөгч нь яллагдагч, шүүгдэгчийн хамаарал бүхий нөлөөнд орсон, хараат байдалд байгаа /гэр бүлийн амьжиргааг залгуулдаг, хууль ёсны төлөөлөгч гэр бүл, төрөл садныхаа нэр хүндийг хамгаалах зорилгоор хохирогчид нөлөөлөх, дарамтлах .../ тохиолдолд хохирогчийн эрх ашгийг бүрэн төлөөлж чадах эсэх нь эргэлзээтэй байдаг тул хөндлөнгийн хүүхдийн эрхийг хамгаалах байгууллагаас хууль ёсны төлөөлөгчийг томилж хэрэг хянан шийдвэрлэх ажиллагаанд, шүүх хуралдаанд оролцуулдаг. Энэ дагуу бага насны хохирогчийн хууль ёсны төлөөлөгчөөр Өвөрхангай аймгийн гэр бүл, хүүхэд залуучуудын хөгжлийн газрыг тогтоож, тус газрын хүүхдийн эрх, хамгаалал хариуцсан ахлах мэргэжилтэн, хүүхдийн эрхийн улсын байцаагчийг шүүх хуралдаанд оролцуулжээ.

Шүүхээс шүүгдэгч Б-г бага насны буюу 11 настай хохирогчийн эсрэг хүчиндэх гэмт хэргийг үйлдсэн гэм буруутайд тооцож, 13 жилийн хугацаагаар хорих ял оногдуулж шийтгэв.

Мэдээг бэлтгэсэн: Өвөрхангай аймгийн Хархорин сум дахь Сум дундын шүүхийн шүүгч Э.Дулмаа