​Ураны салбарт хөрөнгө оруулж хохирсон Чехийн компани Засгийн газрыг Арбитрын шүүхэд өгнө

Цөмийн эрчим хүчинд хандах дэлхий нийтийн хандлага өөрчлөгдөж байгаатай холбоотойгоор Монгол Улсын Засгийн газар ураны олборлолт, хайгуулын чиглэлээр үйл ажиллагаа эрчимтэй явуулахаар зэхэж байгаа билээ. Энэ бодлогын хүрээнд Монголд явж байгаа төслүүдийг урагшлуулах, эрчимжүүлэх талаар хүчин чармайлт гаргаж, Францын “Орано” групптэй хөрөнгө оруулалтын гэрээ байгуулахаар ажиллаж буй. Тэгвэл Засгийн газрын бодлогын шийдвэр энэ салбарт хөрөнгө оруулсан бүх хөрөнгө оруулагчдад харилцан адилгүй байгаа бололтой.

Төрийн өмчит “Мон Атом” компанитай хамтран “Гурвансайхан” ХХК-ийг үүсгэн байгуулж, Дундговь, Сүхбаатар аймгийн нутагт ураны хайгуул, судалгааны төсөл хэрэгжүүлж байсан Чех Улсын хөрөнгө оруулагчид өнөөдөр олон нийтэд хандаж дараах мэдээллийг өгсөн юм.

• Төрийн өмчийн “Мон Атом”-той хамтарсан учир хөрөнгө оруулалт илүү баталгаатай гэж итгэсэн.
• “Гурвансайхан” хамтарсан компани байгуулж, хөрөнгө оруулж эхэлсэн.
• Өнөөдрийг хүртэл 60 сая ам.доллар буюу 310 тэрбум төгрөгийн хөрөнгө оруулсан.  
• Технологи тал дээр салбартаа дэлхийд тэргүүлэгчдийн нэг Казакстан улсын “Казатомпром” компанийг оролцуулж, хамтран энэ төсөлд оролцож, хайгуул, судалгааны ажлыг эрчимжүүлж, улмаар үйлдвэрлэл, олборлолтын шатанд хүрч ирээд байсан.
• Гэтэл нийтийн эрх ашгийг хамгаалах эрхтэй иргэний нийгмийн байгууллага мөн эсэх нь эргэлзээтэй “Их бага баян шарга” нэртэй байгууллагаас манай компанийн ашигт малтмалын тусгай зөвшөөрлийг олгосноос хойш 5 жилийн дараа шүүхэд хандаж, Монгол Улсын шүүх, Монгол Улсын Засгийн газрын оролцоотой компанид итгэсэн бидний итгэлийг үгүй хийж, төрийн байгууллагын лиценз бичилтийн техникийн шинжтэй алдааны улмаас лицензийг хүчингүй болгох шийдвэрийг шүүхээс гаргаж, БНЧех Улсын хөрөнгө оруулагч бидний Монгол Улсад оруулсан 310 гаруй тэрбум төгрөгийн хөрөнгө оруулалтыг үнэгүйдүүлж, үгүй хийгээд байна.
• Монгол Улсын шүүх нь төрийн байгууллагын техник, зохион байгуулалтын шинжтэй алдаанд хэт ач холбогдол өгч, гадаадын хөрөнгө оруулагчдын Монгол Улсын Засгийн газар, Засгийн газрын оролцоотой компанид итгэсэн хууль ёсны итгэлийг үгүй хийх шийдвэр гаргаад байна.
• Хэрэв өнөөдрийн энэ нөхцөл байдлыг Монгол Улсын төрийн байгууллагууд залруулах, хууль ёсны гэж бидэнд итгүүлж олгосон зөвшөөрлийнхөө хүчин төгөлдөр байдлыг дахин хангуулах талаар шаардлагатай арга хэмжээ авахгүйд хүрвэл бид өөрсдийн эрх, ашиг сонирхлыг хамгаалах хүрээнд Олон улсын арбитрын шүүхэд хандаж, өнгөрсөн бүхий л хугацаанд оруулсан хөрөнгө оруулалт, ирээдүйд олохоор төлөвлөсөн алдагдсан боломж, хохирлоо нэхэмжилнэ.