А.Сүхбат Г.Өсөхбаярын дээр эрэмбэлэгдэх ёстой

Дархан аварга А.Сүхбат Төв аймгийнхаа 100 жилийн ойн баяр наадамд барилдахаар бэлтгэлээ эрчимтэй базааж байгаа тухай мэдээлэл гарсны дараа МҮБХ “Энэ жилийн Үндэсний их баяр наадмын хүчит бөхийн барилдааны зүүний магнайд дархан аварга Г.Өсөхбаяр босож барилдана” гэсэн тодруулга мэдээлэл өгсөн билээ.

Тэрхүү тодруулга тайлбартаа чухам яагаад Г.Өсөхбаяр зүүний магнайг тэргүүлэх болсны учрыг “А.Сүхбат, Г.Өсөхбаяр хоёр дархан аварга цолыг нэг өдөр авсан. Цол авахаас өмнөх амжилтыг тооцвол Г.Өсөхбаяр илүү байгаа” гэж тайлбарласан. Гэвч үнэндээ энэ тайлбар буруу юм. 

Учир нь, Монгол Улсын Ерөнхийлөгч хоёр даян аваргад цол олгох үед тэд аль хэдийнэ зодог тайлсан байсан. Өөрөөр хэлбэл, тэдний өмнө нь гаргачихсан амжилтыг үнэлж өгсөн байдаг. Яг энэ агуулгаар нь авч үзвэл, дархан аварга цол хүртэх болзлоо А.Сүхбат түрүүлж биелүүлж, Г.Өсөхбаяр хойноос нь хөөх байдлаар явсан. А.Сүхбат амжилтаа гаргачихаад зодог тайлчихсан. Тиймээс ч А.Сүхбатад түрүүлж дархан аварга цолыг хүртээж, дараа нь Г.Өсөхбаярт цол тэмдгийг нь гардуулсан байдаг юм.

Монгол наадмын цолтнууд бүгд нэг өдөр цолоо хүртдэг ч цолны даваанд барилдаан болгон зэрэг өндөрлөх боломжгүй байдаг шиг Ерөнхийлөгч нэг өдөр цол олголоо ч үнэмлэхийг нь зэрэг бичих боломжгүй. Монгол наадамд бөхчүүд цолны болзол эхэлж биелүүлсэн нь буюу давааг түрүүлж давсан нь эхэнд эрэмбэлэгддэг хуультай. Тийм ч учраас Ерөнхийлөгч цолны үнэмлэх бичихдээ эхлээд А.Сүхбатынхыг, дараа нь Г.Өсөхбаярынхыг бичсэн. Үнэмлэх бичигдэж цол олгогдсоноос хойш харин хоёр аваргыг амжилтаар эрэмбэлэх боломжгүй. Энэ бол А.Сүхбат аварга зүүний магнай болохыг нотлох хангалттай үндэслэл. Гэвч МҮБХ өнөөдрийг хүртэл буруу шийдвэр гаргаж явж ирсэн төдийгүй тайлбараа ч буруу хийсээр байна.