Билл Гейтс 27 жил хамт амьдарсан эхнэрээсээ салж буйгаа зарлав

Дэлхийн баячуудын эгнээнд дээрээсээ дөрөвт жагсдаг, Майкрософтын үүсгэн байгуулагч Билл Гейтсийг танихгүй хүн байхгүй биз ээ. Харин түүний эхнэр, ажлын хамтрагч, өнөөдрийн энэ амжилтад хүрэхэд хамгийн их нөлөөлсөн хүн болох Мелиндаг хүмүүс тэр бүрчлэн мэдэхгүй.

Хамгийн анх 1987 онд Мелинда Билл Гейтсийн үүсгэн байгуулсан ''Майкрософт'' компанид борлуулалтын менежерээр ажилд орсон бөгөөд тэдний харилцаа өдөр ирэх тусам дотносож, улмаар 1994 онд Хавайн Ланай арал дээр хуримлаж байжээ. 

Тэд амьдрал дээр ч, ажил дээр ч төгс хамтрагчид байв. Тиймдээ ч 2000 онд ''Bill & Melinda Gates Foundation''-ийг үүсгэн байгуулсан нь эрүүл мэнд, боловсрол, уур амьсгалын өөрчлөлтөд анхаарал хандуулж, дорвитой арга хэмжээ авдаг Олон Улсын байгууллага болсон билээ.

''Билл бид хоёр бүх зүйл дээр ижил тэгш эрх, үүрэгтэйгээр хамтардаг. Миний хувьд гурван хүүхдээ хараад гэртээ суудаг эхнэр байна гэдэг үнэхээр хэцүү байсан. Харин нөхөртэйгөө хамт ажиллах нь бидний харилцааг ойртуулж хялбарчилсан байх. 

27 жилийн хамтын амьдралаа дуусгавар болгож байна. Бид энэ хугацаанд гурван гайхамшигтай хүүхдийг өсгөж хүмүүжүүлсэн. Дэлхийн хүмүүсийн амьдралд эерэг нөлөө үзүүлж чадах санг байгуулсан. Энэхүү сангийнхаа үйл ажиллагааг тасалдуулахгүй, зорьсон зорилго, үнэт зүйлсээ умарталгүй хамтран ажилласаар байх болно.'' хэмээн Мелинда өөрийн твиттер хуудсандаа жиргэжээ.