Нэг километр авто зам ба МОНГОЛ УЛСЫН ЕРӨНХИЙ САЙД

Улсын хэмжээнд бодлого боловсруулах ёстой сайд, төрийн өндөр албан тушаалтнууд аар саархан зүйлтэй ороолцолдож, жижиг хэмжээний бүтээн байгуулалтад оролцож, тууз хайчлах нь хэвийн үзэгдэл болжээ.

Хамгийн сүүлийн жишээ гэвэл өчигдөр /2022.08.14/ Улсын төсвийн хөрөнгө оруулалтаар хэрэгжиж байгаа нэг км авто замын ажилтай Ерөнхий сайд, Нийслэлийн засаг дарга нар танилцсан явдал.

Уг нь улсын Ерөнхий сайд хүн макро төвшний асуудалд анхаарлаа хандуулж, улсын хэмжээний бодлого тодорхойлж, шаардлагатай тохиолдолд томоохон бүтээн байгуулалт дээр л очдог.

Өөр улсуудын Ерөнхий сайд олон км-ийн урттай автозамын нээлтэд, хоёр орныг холбосон замын ажилтай танилцаж байхад манай Ерөнхий сайд нэг км замын ажилтай танилцаж, тамхи татсан хүнийг 50 саяар торгох ёстой хэмээн ярьж сууна.

Нөгөө талд Ерөнхий сайд онцгойлон анхаарах ёстой Улаанбаатар-Дарханы замын асуудлал 2019 оноос хойш тулгамдсаар байна. Аль 2019 оны арван нэгдүгээр сард ашиглалтад орно гэж байсан тус замын бүтээн байгуулалт одоог хүртэл үргэлжилсээр. Энэ бүх хугацаанд Дарханы зам дээр нийт 340 удаагийн зам тээврийн осол бүртгэгдэж, үүнээс 28 хүн амиа алдсан байна.

АНУ-д бол авто замын нээлтэд сайд байтугай мужийн захирагч нь ч ирдэггүй жишигтэй. Харин манай Ерөнхий сайд хийх ажилгүйдээ ийм зүйл яриад нэг км замын үйл явцтай танилцаад байна уу ? Эсвэл Ерөнхий сайдгүй л бол нэг км зам ашиглалтад орох боломжгүй болчихсон болохоор очсон байж магадгүй юм. Түүнээс гадна Хөвсгөл аймагт тавигдсан нэг км замын шав тавих үйл ажиллагаа дээр ХЗДХ-ийн сайд оролцож үг хэлсэн нь иргэдийг шүүмжлэлийг хүртэж байсан нь саяхан.

Тэгвэл бусад улсын Ерөнхий сайд ямар хэмжээний авто замын нээлтэд оролцож буй талаар танилцуулъя.

Угтаа бол бага хэмжээний бүтээн байгуулалт, үйл ажиллагаанд засгийн газрын гишүүд, тэр дундаа Ерөнхий сайд бус дүүрэг, хороон дарга оролцсон нь зүйтэй. Дүүрэг, хорооны засаг дарга оролцож, танилцахад болох ажил дээр засгийн газрын гишүүд нь очсоор байвал гүйцэтгэх засаглалыг улам хүчгүйдүүлсээр байна. 

Тэгвэл энэ талаар УИХ-ын дарга асан З.Энхболд Ерөнхий сайд "нэг км засмал замтай танилцах биш 1000 км засмал замыг нээж тууз хайчлах ёстой. 1 км бол хороон даргын зиндаа хавь юм уу? 2012-2016 онд 3200 км засмал зам ашиглалтад орсон байдаг. Одоо л Дарханы 200 км дээр л би чи дээрээ тулаад ашиглалтад оруулж чадахгүй 6 дахь жилийн нүүр үзэж байна." хэмээн өөрийн цахим хуудастаа бичжээ. 

Энд ерөнхий сайд Л.Оюун-Эрдэнэ, Нийслэлийн засаг дарга Д.Сумъяабазартай хамт нэг км зам дээр ажиллаж байхад тэнд Дарханы замын балгаар олон зуун хүн амь нас, эрүүл мэнд, эд хөрөнгөөрөө хохирсоор байна. Аар саархан зүйлд биш олон хүнийг хохироосоор байгаа Улаанбаатар-Дарханы зам дээр ажиллаж, үйл ажиллагааг нь хурдасгах тал дээр анхаарвал илүү нүдээ олсон ажил болох биз.