БАРИМТ: Ж.Ганбаатарын “Камдер” компани ногоон байгууламж "СҮЙТГЭЖ", барилга барихаар УЛАЙРЧ байна

Нийслэлийн Хан-Уул дүүргийн нутагт орших, иргэдийн ая тухтай амрах орчин болгох боломжтой сүүлчийн газар УИХ, Засгийн газрын гишүүн Ж.Ганбаатарын хамаарал бүхий компани барилга барихаар мод, бутыг шилжүүлэн зөөж байгаа гэх асуудлаар иргэд өчигдөр манай редакцид хандсаны дагуу сурвалжилга бэлтгэснээ хүргэж байна.

НОГООН БАЙГУУЛАМЖ БҮХИЙ ГАЗРЫГ  “БЕТОНОН ШИРЭНГЭ" ДУНДАХЬ БАЯНБҮРД БОЛГОХ БОЛОМЖТОЙ

Асуудал гараад байгаа газар нь Нийслэлийн Хан---Уул дүүргийн 19 дүгээр хорооны нутаг дэвсгэр, Үйлдвэрийн гудамж буюу олны сайн мэдэх “Оргил” худалдааны төвийн урд, “Оргил стар” хотхоны хажууд байрладаг.  

Өмнө нь “Кашмир холдинг” ХХК эзэмшиж байхдаа мод бут сөөгийг нь хугалж, булж байгаад мэдэгдэж, тус дүүргийн иргэдийн төлөөлөгч Б.Жагар тэргүүтэй иргэд очиж эсэргүүцэл илэрхийлж байсан тэр цэцэрлэгт хүрээлэн юм байна. 

Хэл ам гарсны дараа “Оргил”-ын гэгдэх, УИХ-ын гишүүн, УУХҮ-ийн сайд Ж.Ганбаатарын эзэмшлийн “Камдер” ХХК-д шилжиж, тэд одоо шөнийн цагаар мод бут, сөөгийг нь шөнийн цагаар шилжүүлэн зөөж байгаа аж.  

11,800 м2 хэмжээтэй, ногоон байгууламж бүхий уг газар нь Хан-Уул дүүргийн хүн ам шигүү суурьшсан хэсэгт үлдсэн цорын ганц цэцэрлэгт хүрээлэн гэнэ. Иргэдийн баталж байгаагаар, “Кашмир холдинг” эзэмшихээс өмнө  уг газарт улиас, хайлаас, шар хуайс зэрэг 10 гаруй нэр төрлийн 17,000 бут сөөг байсан гэнэ. Тодруулбал, нийслэлд нүдний гэм болоод буй ногоон байгууламж бүхий нэг цэцэрлэгт хүрээлэн “Оргил”-ын хэмээх Ж.Ганбаатар сайдын компанийн гарт ороод дуусах нөхцөл байдал үүсжээ. 

Өмнө нь...

Одоо...

Энэ газрыг ногоон байгууламжтай чигээр нь тохижилт хийсэн бол ойр хавьдаа байхгүй эко орчин бүрдүүлэх боломж байсан гэнэ. Гэхдээ одоо ч найдлага байгаа бөгөөд "Камдер" ХХК хэдий мод бут шилжүүлэх төлбөрөө төлсөн ч Нийслэлээс албан ёсны зөвшөөрөл өгөөгүй байх магадлал өндөртэй. 

Учир нь, анх эксковатортой ирж мод ухахад нь иргэд Цагдаагийн байгууллагад хандаж, цагдаа нар ирэн таслан зогсоож байсан гэнэ. Гэтэл түүнээс хойш шөнийн цагаар ирж мод ухан зөөх болсон нь Нийслэлээс зөвшөөрөл өгөөгүй хэвээр байгаа гэдгийг харуулж байгаа юм. Энэ хэрэг одоо Экологийн цагдаагийн албанд шилжин шалгагдаж байгаа гэнэ. Энэ хэрэг хэрхэж байгааг бид сурвалжлах болно.    

70-80 ЖИЛ УРГАСАН 500 ОРЧИМ МОД, БУТЫГ 2007 ОНЫ ТАРИФААР БОДОЖ 66.9 САЯ ТӨГРӨГ ТӨЛЖЭЭ

“КАМДЕР” ХХК-ийг 2007 онд Жамбалын Наранцэцэг үүсгэн байгуулсан бөгөөд одоо Жамбалын Ганбаатар, эхнэр Б.Хишигжаргал, охин Г.Хүслэн нарын хамт эзэмшдэг. Эцсийн өмчлөгчөөр Ж.Ганбаатар бүртгэгджээ. Гүйцэтгэх удирдлагаар бүртгэгдсэн Б.Төгсбаяр нь Ж.Ганбаатар сайдын дүү Ж.Нарантуяагийн нөхөр гэнэ.

Тус компанийн хашаалсан газрын ногоон байгууламж нийслэлийн өмч гэж тооцогддог. Тиймээс "Камдер" ХХК газар дээрээ барилга барих гэж байгаагаа нийслэлд мэдэгдэж, 2022 оны дөрөвдүгээр сард мод, ургамлын тооллого явуулж, 66.9 сая төгрөг төлжээ. 13 улиас, 95 ширхэг хайлаас, 343 бут сөөгийг ингэж үнэлсэн аж.

Уг газарт 25 давхар, найман блок барилга баригдах юм байна.

“КАМДЕР” ХХК-ИАРАА НОГООН БАЙГУУЛАМЖ СҮЙТГЭГЧ Ж.ГАНБААТАР УУЛ УУРХАЙН КОМПАНИУДААС НӨХӨН СЭРГЭЭЛТ ХИЙХИЙГ ШААРДАЖ ЧАДАХ УУ  

Иргэд хувь хүмүүс хотын төвд байтугай захад ногоон байгууламж бүхий газар эзэмшихийг хориглодог. Гэтэл  “Камдер” ХХК газар эзэмшиж, хүссэнээ хийж байна. 11.800 м2 ногоон байгууламж, хотын хүн ам шигүү суурьшсан бүсэд байна гэдэг уг нь хотын стандартыг өргөх, иргэд оршин суугчдыг “Аз жаргалтай” болгоход маш нэмэртэй баймаар.

Нийслэлийн эрх зүйн байдлын тухай хууль гэж бий. Энэ хуулийг бүгд дагаж мөрдөх үүрэгтэй. Нийслэлийн “Үндсэн хууль” гэж болох энэ хуульд иргэний эрхийг тодорхой болгож өгсөн. 

Иргэд дэд бүтцийн сүлжээгээр хангагдсанаас гадна амьдралын таатай нөхцлийг шаардах эрхтэй болсон. Хотын стандарт, дүрэм журмууд бол дэлхийд ч байхгүй үнэхээр сайн. Нэг хүнд ногдох ногоон байгууламжийг тодорхой заасан. 

Даанч Монголд гаргасан ямар ч сайн хууль цаасан дээр үлддэг, Ж.Ганбаатар мэтийн эрх мэдэлтнүүд нийслэлийн хууль журам, зорилго зорилтыг үл ойшоон дураараа авирладгийн нэг жишээ нь энэхүү Хан-Уул дүүргийн хүн ам шигүү суурьшсан бүсэд үлдсэн сүүлийн ногоон байгууламжтай холбоотой хэрэг явдал харуулж байна.

Нөгөө талаар, энэ хэрэг явдлыг Уул уурхай, хүнд үйлдвэрийн сайд хүний эзэмшдэг компани хийж байгаа нь даанч гунигтай. Уул уурхайн салбар бол ААН-үүдийг ашигт малтмалын хайгуул олборлолт хийх боломжоор хангахын зэрэгцээ ашиглагдсан газар бүртээ нөхөн сэргээлт хийхийг шаардаж, сөөм газар бүрийг нөхөн сэргээлгэхийн төлөө тэмцдэг газар гэж ойлгодог.

 Тэр ч утгаараа мэргэжлийн байхаас гадна эх орон, байгаль дэлхийдээ хайртай хүн энэ салбарыг удирдах ёстой гэж боддог юм. Гэтэл мэргэжлийн бус, дээр нь байгаль орчноо хайрлахгүй олз ашгийн араас явдаг хүн салбарын яам удирдаад явах нь хэр ёс зүйтэй хэрэг вэ гэсэн асуулт ч эндээс гарч ирж байна...

Үргэлжлэл бий...  

Видео сурвалжилгыг Зөв.мн пэйжээс 20.00 цагт хүлээн авч үзээрэй......