23 жил, 9 дарга: Хэн нь илүү буруутай вэ

-Шилэн ажиллагаа дөнгөж эхэлж байна: Статистик чухал ч нарийвчлах нь илүү чухал-

Цахим хөгжлийн яам Засгийн газраас зарласан “Шилэн” ажиллагааны хүрээнд Нийслэлийн үе, үеийн Засаг дарга нарын гаргасан газар эзэмших ашиглах захирамжийн мэдээллийг ил болголоо. Мэдээлэл ил болсноор нийслэлийг хүүхэд тоглох талбайгүй шахам “Бетон ширэнгэ” болоход хувь нэмрээ оруулсан үе, үеийн Засаг дарга нарын нэрс ил болж байна. Улмаар Засаг дарга нарыг олгосон захирамжийн тоо, ашиглуулах, эзэмшүүлэх эрх олгосон газрын хэмжээгээр нь жагсааж, муучлан шаарлах байдал ч ажиглагдаж эхлэх бололтой. Тэгвэл энд анхааруулж хэлэх үг байна.

Сая ил болсон захирамжууд 2000 оноос хойших үеийг хамарч байгаа. Энэ 23 жилд Нийслэлийг М.Энхболд, Ц.Батбаяр, Т.Билэгт, Т.Мөнхбаяр, Э.Бат-Үүл, Су.Батболд, С.Амарсайхан, Ж.Батбаясгалан, Д.Сумъяабазар гэсэн есөн дарга удирдсан байна.      

Нийслэлд газрыг Нийслэл, дүүрэг, хорооны засаг дарга олгодог. Нийслэлд бүтээн байгуулалт хийгдэж байгаа л бол газар эзэмших, ашиглах захирамж дээр нь энэ гурван субьектийн гарын үсэг байгаа. Засгийн газраас хэрэгжүүлж буй ажлууд, тухайлбал сургууль, цэцэрлэгийн барилга байгууламж үүнд орно. Иргэд газраа өмчилдөг болсноос хойш ААН-д худалдаж, эдийн засгийн эргэлтэд оруулах болсон.

Хувь хүн, ААН байгууллага мэдээж, газар эзэмшиж, ашиглах эрхтэй.

Мөн нийслэл хотын барилгажилт, газрын олдоц хэний үед ямар байсан бэ гэдгийг бодолцох шаардлагатай. Өөрөөр хэлбэл, газар ховордож, нягтшил ихсэн, шинээр гарч буй газар эзэмшүүлэх захирамж болгон ногоон байгууламж зэрэг иргэдийн ая тухай амьдрах орчин нөхцлийг бүрдүүлэх учиртай стандартуудын зөрчих болсон сүүлийн үед нь илүү ач холбогдол өгөх ёстой гэж бодно. 

Тэгэхээр, “Хэн хамгийн олон, эсвэл их газар өгсөн бэ” гэдэг нь Засаг дарга нарыг гоочлох шалтгаан биш юм. Нэгэнт харагдаж байгаа статистикийг нийтлэх нь хэвлэл мэдээллийн байгууллагын үүрэг ч тэрхүү баримтууд нийгэмд хэрхэн нөлөөлж байгааг редакцууд бодолцох зайлшгүй шаардлагатай гэж бодно.      

Гагцхүү хууль зөрчиж, хориотой бүсэд олгосон газрууд, нийслэлийг бетонон ширэнгэ болгоход нөлөөлсөн, ашиг сонирхлын зөрчил, авлигын гэмт хэрэг нуугдаж байх магадлалтай газар олголтуудыг л онилж, тэднийг нэгбүрчлэн нарийн судлах шаардлагатай юм. Нийслэлийг "Бетонон ширэнгэ" гэж, нийслэлчүүдийг Бетонон ширэнгэд хашигдсан өрөвдөлтэй амьтад болгосон буруутанд ийм замаар л хариуцлага тооцох боломж бий. Хууль зөрчсөнийг нь зайлбаргүй нотолж чадаж гэмээ нь нэг кейсээр ч хариуцлага тооцож, хууль бус барилгыг буулгах боломж бүрдэх юм.