ИНЕГ-ын ганц даргын хүүхдээ сургасан мөнгө нэг аймгийн ӨЭМТ-үүдийн бүтэн жилийн төсөвтэй дөхөж байна

-Шаардлагагүй мэргэжлээр суралцсан 35 этгээдийн тэтгэлэг дөрвөн аймгийн ӨЭМТ-үүдийн жилийн төсөвтэй тэнцэж байгаа юм-

Тоо бодож харьцуулсан бичлэгт хэвлэлийнхэн тогоон дотроо “Тоо бодсон бичлэг” гээд дургүй талдаа байдаг юм. Гэсэн ч Засгийн газрын олон сангуудын мэдээлэл ил болсон энэ үед харьцуулах боломж харагдаад үнэхээр тэссэнгүй.

ИНЕГ-аас боловсон хүчнээ бэлтгэхэд зориулж олгодог сургалтын тэтгэлэгийг дарга нар өөрсдийн үр хүүхэд, хамаатан садан, нөлөө бүхий улстөрчдийн хамаарал бүхий этгээдэд олгодог байсан нь тогтоогдоод буй энэ үед тэдний албан тушаалаа ашиглан өөрсдөдөө үүсгэсэн боломжийг ЭМДС-гаас Өрохийн эрүүл мэндийн төвүүдэд олгосон санхүүжилттэй харьцуулж үзмээр санагдлаа.   

Нэг даргын хулгайлсан мөнгө бүхэл бүтэн аймгийн иргэдэд эрүүл мэндийн үйлчилгээ үзүүлэх төсөвтэй тэнцэж байгаа талаарх харвцуулсан мэдээллийг та бүхэнд хүргэж байна.

ИНЕГ-ын дарга асан Т.Батжаргал охин Номондалайгаа 105,338,57 ам.доллараар хоёр удаа АНУ-д сургасан бол охин Б.Хашцолмонгоо 50,000 фунт стерлингийн зардлаар /Хэвлэлүүдэд 50,000 фунт гэж мэдээлж буй бөгөөд ЗТХБЯ-наас гаргасан тайланд зардлыг бичээгүй байв/ Англи улсад сургасан. Энэ мөнгийг өнөөгийн ханшаар тооцож үзвэл 576 сая /353 сая+213 сая/ төгрөг болж буй. Тэгвэл энэ мөнгөн дүн буюу агентлагийн ганцхан даргын өөртөө үүсгэсэн боломж Булган аймгийн ӨЭМТ-үүдэд ЭМДС-гаас олгосон төсвийн 66 хувьтай тэнцэж байна.

ИНЕГ-ын дарга асан Т.Батжаргал

Харин салбарын бус мэргэжлээр сургамж улсаас хулгайлсан /Журам зөрчин, салбарын бус мэргэжлээр үр хүүхдээ сургасан даргын төсвийн мөнгөнөөс гаргуулсан мөнгийг үргүй зардал, нисэхийн салбараас хийсэн хулгай гэж үзэх бүрэн үндэстэй/ 7 тэрбум, 546 сая төгрөгийг аваад үзвэл, бүхэл бүтэн дөрвөн аймгийн ӨЭМТ-үүдэд өгсөн санхүшүжилттэй тэнцэж байгаа юм.

ИНЕГ-ын дарга нарын журам зөрчиж “өөрсдөдөө” олгосон боловсролын тэтгэлэгийг орон нутгийн ӨЭМТ-үүдэд өнгөрсөн онд олгосон санхүүжилттэй харцуулахад ийм дүр зураг бууж байна. Нийт аймгуудын дунд 2 тэрбум хүрэхгүй төсөвтэй долоон аймаг байгаа гээд бодохоор өнгөрсөн хугацаанд улс орны хөгжлийг хэн хойш нь чангааж байсан нь ойлгогдож байна. Өөрөөр хэлбэл, нийтээрээ амьдралын чанараа хангалттай сайжруулах хэмжээний хөрөнгийг цөөн эрх мэдэлтнүүд өөрсдөдөө хэт өндөр өртөгтэй боломж олгох замаар завшиж байсан болж таарч байгаа юм.  

САЛБАРЫН БУС МЭРГЭЖЛЭЭР ГАДААД УЛСАД БОЛОВСРОЛ ЭЗЭМШСЭН 35 ИРГЭНД ОЛГОСОН ТЭТГЭЛЭГ

2,187,396.83 АМ.ДОЛЛАР /Одоогийн ханшаар 7 тэрбум, 546 сая төгрөг /

ЭМДС-ГААС ӨЭМТ-ҮҮДЭД ОЛГОСОН САНХҮҮЖИЛТ

АРХАНГАЙ 1 тэрбум, 355 сая

БАЯН-ӨЛГИЙ 2 тэрбум, 100 сая

БАЯНХОНГОР 2 тэрбум 170 сая

БУЛГАН 875 сая

ГОВЬ-АЛТАЙ 1 тэрбум, 598 сая

ГОВЬСҮМБЭР 910 САЯ