Ц.Амгаланбаатарын МЭДЭГДЭЛ ТЕГ, ШШГЕГ-т “ИХ ЦЭВЭРЛЭГЭЭ” хийх дохио юу

Хүний эрхийн үндэсний комисс өнөөдөр С.Зоригийн хэргийг гардан үйлдсэн этгээдүүдийн нэг гэж өөрийгөө баталж байсан Ц.Амгаланбаатарын хүсэлтээр хэвлэлийн бага хурал хийж, үгийг нь олон нийтэд хүргэлээ. Тус комисс өмнө нь эрүү шүүлтэд өртсөн хоригдлын үгийг ингэж олон нийтэд хүргэж байсан удаа ховор. Хүсэлтүүд бол маш их очдог нь тодорхой байдаг. Эндээс Ц.Амгаланбаатарыг тун ч онцгойлж авч үзсэн гэж ойлгогдоно.

Мэдэгдлийн тухайд, эхний хэсэг нь “н.Чимгээ, н.Содномдаржаа нарыг эрх баригчдын хүслээр гүтгэсэн, хариуд нь амь хэлтрүүлж, гадагшаа зугтаалгахаар амласан” гэсэн утгатай. Нөгөө хоёр нь суллагдчихсан болохоор энэ ч тодорхой. “Яагаад удаан дуугүй байж байгаад одоо дуугарав” гэдэг асуулт үлдээхээс өөр ач холбогдолгүй. Ц.Элбэгдоржийн нэрийг хэлсэн нь л сонин. Харин дараагийн хэсэгт нь ач холбогдолтой байж мэдэх мэдээлэл дуулгасан нь “Хүсээгүй хэргийг нь хийлгэж, бусдыг гүтгүүлсэн ТЕГ-ын ажилтнууд одоо ч ажлаа хийсээр байгаа учраас амь насныхаа төлөө санаа зовж байгаа” тухай асуудал байв. 

Хүн амь насныхаа төлөө санаа зовох нь мэдээжийн хэрэг. Улмаар Хүний эрхийн комисст хандах, хамгаалалтад орох эрх нь ч нээлттэй. Харин түүний мэдэгдлийн араас “ТЕГ-ын ажилтнууд н.Чимгээ, н.Содномдаржаа нарыг эрүүдэн шүүж, С.Зоригийн хэргийг хүлээлгэхэд оролцсон” гэдэг үндэслэлээр ажлаасаа халагдаж магадгүй нь. Мөн Ц.Элбэгдоржийг янз бүр болгох эхлэл байж болно. Магадгүй, энэ мэдэгдлийн хамгийн том агуулга нь энэ ч байж мэдэх юм. Өөрөөр хэлбэл, Ц.Амгаланбаатарын мэдүүлгийн араас экс ерөнхийлөгчид асуудал үүсгэх акц, эс бол ТЕГ, ШШГЕГ-т дорвитойхон халаа сэлгээ явагдаж тун магадгүй нь. Эрх баригчид хоригдлоор хүссэнээ хийлгэдэг юм бол Ц.Амгаланбаатар одоо ч эрх баригчдын хүслийг дагаж байж мэднэ гэсэн үг.

Дашрамд, хуулийн байгууллага н.Чимгээ, н.Содномдаржаа нарыг сулласан ч цагаатгаагүй нь хэзээ нэгэн цагт хурц хурц мэдэгдэл хийж тодорч гарна гэсэн хүлээлтийг үүсгэдэг билээ.