Л.Энх-Амгалан, Г.Ганбаяр нар аа, чаддагт нь зайгаа тавиад АЖЛАА ӨГ...

Хичээлийн шинэ жил эхлээд ердөө хэдхэн хонож буй ч боловсролын салбарын байгаа царай багш сурагчид, эцэг эхчүүдийг бухимдуулж байна. 

Хичээл нь эхлээгүй сургуулиуд, стандарт хангаагүй байрнаас болж олон мянган хүүхдүүд үндсэн эрх нь зөрчигдөж хохирч байгааг бид сүүлийн гурван өдөр тасралтгүй харж, сонсож байна. 

Мөн сургуулиудын даац хэрээс хэтэрснээс үүдэж хүүхдүүдийн эрүүл мэндэд ч хохирол учрах ноцтой байдал үүсээд байгаа нь нууц биш. Ийм л дампуу, амин хувиа бодсон нөхөд энэ салбарыг удирдах нэрээр улам унагаж байгааг эрх баригч нам, Засгийн газар анхааралдаа авах, хариуцлага тооцох шаардлага нэгэнт бий болжээ.

Багш нарынхаа цалинг ч мэддэггүй салбарын сайд нар уналтанд орсон боловсролын салбарыг одоо бүр улан дороо дэвсэлж байгааг ард түмэн үүнээс илүү яаж тэсэж, тэвчих ёстой вэ.

Салбарынх нь ажил салан задгай, яг л жолоочгүй машин шиг болчихоод байна. Салбарын боловсон хүчний гол найдлага болоод байсан Боловсролын ерөнхий хууль УИХ-ын анхны хэлэлцүүлгээрээ төрөл арилжиж, Үйлдвэрчний эвлэлийн холбоодын эсэргүүцэлтэй тулгарсан.

Сайдынх нь ам ажил зөрдөг, хэрэгцээгүй зүйлд баахан зардал гаргадаг гээд хэл ам таталдаг ч засардаггүй. Багш нарын үнэлгээний шалгалтын даалгавар нь дэндүү хүнд. Тийм атал өнөөдөр багш нар өндөр цалин авдаг хэмээж сууна. Үүнийг багш нар эгдүүцэж, шүүмжилж байгаа нь хэн бүхэнд илхэн байна.Дэд сайд нь байгаа байхгүй нь мэдэгдэхгүй, юу хийдэг нь тодорхойгүй Г.Ганбаяр гэх нөхөр бий. Иймэрхүү намын “цүнхчдийг шагнаж” сайдын албан тушаал өгдөгөө одоо болих хэрэгтэй.

 Манай Парламент, Засгийн газрын гишүүд “Бид хариуцлагагүй, худалч ард түмний төлөөлөл гэж алдаагаа хаацайлдаг бол бидний зэрэг зиндаанд нь хүрч очихыг зориод, хүсэж мөрөөдөөд, төлөвлөөд байгаа тэр хөгжингүй улсуудад төрийн албан хаагчид нь өөрсдийгөө “Ард түмнээ сахилга хариуцлага, ёс зүй, хүнлэг чанарт уриалах амьд жишээ, үлгэр дууриалал” гэж хатуу ойлгосон байдаг.

 Ард түмний дунд ч “Ийм байх ёстой” гэсэн ойлголт бат суусан учир буруу үлгэр дуурайлал үзүүлсэн, алдаа гаргасан улстөрч нөлөөлийг нь гүнээ ухамсарлаж, уучлалт хүсээд огцордог.

Албан тушаал өндөрсөх тусам алдаа томорч, хүлээх хариуцлага чангарна гэдгийг л бүгд хатуу ойлгох учиртай. Давуу эрхээ ашиглах, олон нийтэд худал ярих битгий хэл ажилдаа хариуцлагагүй хандах гэх мэт нийгэмд үлгэрлэвэл хорлонтой алдаа гаргасан л бол тэрийгээ мэдрээд улстөрч нь өөрөө огцрох өргөдлөө өгдөг тийм нэг ёс зүйн торгон мэдрэмжийг төрд суулгахыг л бид хүсээд байгаа шүү дээ.

Л.Энх-Амгалан сайдын ганцхан хоногийн дотор мэдэгдсэн, өөрөө нэмж гаргасан алдаанууд өнгөц харахад хүн болгоны хийчихдэг, манай хэмжүүрээр бол уучлал гуйгаад цайрчихдаг жижиг алдаа мэт боловч үнэндээ маш том алдаанууд юм. Үүнд ажил эхлүүлсэн юм, асуудлыг нь анх гаргаж тавьсан юм, хөөрхий гэж өөхшүүлэх, эвийлэх шаардлага огт байхгүй.

Ажлаа хийж чадахгүй байна аа гэдгийг чинь ард олноороо хэлж байна. Үүнээс том шалтгаан гэж байх уу. Л.Энх-Амгалан, Г.Ганбаяр нар аа, чаддагт нь зай тавиад ажлаа өг...