О.Баасанхүү: УИХ-ын найман гишүүнтэй холбоотой мөнгө угаасан хэргийг шийдэхгүй бол МУ Саарал жагсаалтаас гарахгүй

УИХ-ын гишүүн О.Баасанхүү цаг үеийн асуудлаар сэтгүүлчдэд мэдээлэл өглөө. УИХ-ын найман гишүүний хамаарал бүхий аж ахуй нэгж мөнгө угаасан нь тогтоогдсон. Эдгээр найман гишүүнийг шалгаж, энэ хэргийг шүүхээр оруулж шийдвэрлэхгүй бол Монгол Улс саарал жагсаалтаас гарахгүй гэдгийг хэлсэн юм. Түүний яриаг дэлгэрэнгүй хүргэе.

Тэрбээр "Саарал жагсаалттай холбоотой асуудлаар өнгөрсөн долоо хоногт Эдийн засгийн байнгын хороонд миний бие байр сууриа илэрхийлсэн. Саарал жагсаалтанд орох нь зөв, орохгүй нь зөв гэдгийг хэн нэгэн очиж тайлбарлах ёстой биздээ. Үүнийг тайлбарлах үүрэг бүхий хүн нь хууль зүйн сайд. Гэтэл хууль зүйн сайд яваагүй Францын Парис хотод очоогүй. Би яагаад та яваагүй юм бэ. Яагаад очиж тайлбар хийдэггүй юм бэ гэдэг нэгдэх асуудлыг тавьсан. Хоёрдугаарт нь саарал жагсаалтанд дөрвөн чиглэлийн зөвлөгөө өгсөн. Гэтэл тэр дотор “Мөнгө угаах гэмт хэргээр нэг ч хэргийг шүүхээр шүүхгүй байна” гэсэн. 

Өмнө нь би УИХ-ын 49 гишүүн Жижиг дунд үйлдвэрлэлийн сангаас зээл авсан байна. Энэ асуудлын явц ямар байгаа вэ гэсэн албан бичиг хүргүүлсэн. Гэтэл асуултанд хоёр хуудас хариулт өгсөн.  2019.08.01-ний өдөр надад Авлигалтай тэмцэх газраас албан бичиг ирсэн юм. Гэтэл сонирхол татсан нэг албан бичиг байна. “Санхүүжилтэнд хамрагдсан иргэн аж ахуйн нэгж дотор барьцаалан зээлдүүлэх үйлчилгээ эрхэлдэг банк бус санхүүгийн байгууллага, хадгаламж зээлийн хоршоодтой хамаарал бүхий 34, албан тушаалтантай хамаарал бүхий 11 аж ахуйн нэгж байгааг тогтоосон. Үүн дотор мөнгө угаасан найман аж ахуйн нэгжийг тогтоосон” гэсэн байгаа. Энэ асуудлыг шүүхээр шийдэхгүй бол саарал жагсаалтаас гарахгүй ээ. Саарал жагсаалттай холбоотой арга хэмжээ авагдахгүй. Өөрөөр хэлбэл мөнгө угаасан найман аж ахуйн нэгжийн нэрийг зарлахгүй байна.

Хүсвэл хуулийнхэн юмаа ярьдаг. Хүсэхгүй бол ярьдаггүй шүү дээ. Жишээлбэл, цагдаагийн алба хаагч сэтгүүлчдийг тагнасан нь үнэн. Шалгаж байгаа нь үнэн. Гэтэл Цагдаагийн ерөнхий газрын дарга С.Баатаржав цагдаагийн байгууллага тагнаагүй гэсэн.  Ийм бичгийг Мандахбаяр гэдэг хүнд өгсөн байналээ би харсан. Цагдаагийн байгууллага  хүнийг тагнадаг юм биш. Цагдаагийн албан хаагч, албан тушаалтан, мөрдөн байцаах, эрүүгийн цагдаа хүнийг тагнадаг. Цагдаагийн байгууллага үгээр тоглож улстөржиж болохгүй.

Үүнтэй ижил мөнгө угаасан найман хүнийг асуух ёстой. Хэн гэдэг найман их хурлын гишүүн бэ. Яагаад саарал жагсаалтад орох болсон талаар ярих ёстой. Ирэх долоо хоногийн мягмар гарагт энэ асуудлыг хаалттай хэлэлцье гэж байна. Юуг нь хаагаад, хэнээс нуугаад байгаа юм. Жишээ нь 1000 хятад орж ирэхэд хаалттай хэлэлцсэн. Одоо энэ асуудлыг хаалттай ярина гэнэ. Монгол улсад 500 Банк бус санхүүгийн байгууллага байна. Үүнээс 34 нь эрх мэдэл бүхий төрийн албан хаагчийнх, 11 нь УИХ-ын гишүүнийх байна. Гэтэл үүнээс наймынх нь мөнгө угаасан үйлдэл тогтоогдсон байна гээд Авлигатай тэмцэх газрын Мөрдөн шалгах хэлтсийн дарга  Х.Буянтүмэн бичиг өгсөн. Дараа нь прокурорын байгууллагаас Х.Буянтүмэнг дарамталсан" гэлээ. 
 

Т.Дашмаа

Сэтгэгдэл (0)
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.