Засгийн газрын ээлжит хуралдаанаар хэлэлцсэн асуудлыг танилцуулж байна. Танилцуулгын эхэнд ЗГХЭГ-ын дарга, Монгол Улсын сайд Н.Учрал Баялгийн санд хөрөнгө төвлөрүүлэх Ст ратегийн ордуудын тоог өргөжүүлэх асуудлаар мэдээлэл өглөө.
Тэрбээр “Төр өөрийн хөрөнгөөр хайгуул хийж нөөц тогтоосон, улс орон, бүс нутгийн эдийн засагт өндөр ач холбогдолтой ашигт малтмалын ордуудыг Стратегийн ордод тооцох тогтоолынг УИХ 2007 онд гаргасан байдаг.
Мөн Стратегийн ордод тооцох боломжтой 39 ордыг хавсралтаар баталсан боловч өнөөдрийг хүртэл жагсаалтад албан ёсоор нэмэлгүй явж ирсэн. Энэ 18 жилийн хугацаанд эдгээр 39 ордыг хувьдаа авч, гаднын компаниудад зарсан тохиолдлууд ч бий. Тиймээс хавсралтад багтаасан 39 ордыг Стратегийн ордод тооцох ажлыг эхний ээлжинд хийхээр боллоо” хэмээн мэдэгдлээ.
Ингэснээр Баялгийн санд хөрөнгө хуримтлуулах боломжтой ордын тоо 55 болж нэмэгдэнэ гэдэг мэдээллийг тэрбээр өглөө.
39 ордын нөхцөл байдлын тухайд, тэрбээр зарим нь гаднын компаниудад зарагдсан гэдгийг дурьдаад “3.1 тэрбум тонн эрчим хүчний нүүрс бүхий Төгрөг нуурын ордыг Х.Баттулга Сингапурын компанид зарсан байдаг. Тиймээс Х.Баттулгад Төгрөг нуурын ордыг Баялгийн санд өгөх долоо хоногийн хугацаа өгч байна” хэмээн онцолсон юм.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна