​Б.Найдалаа: П.Наранбаяр сайд бид хоёр зодолдоогүй. Хүний нүд рүү гараа хийчихдэг шиг л санамсаргүй юм болсон

УИХ-ын гишүүн Б.Найдалаагаас цаг үеийн асуудлаар тодруулга авлаа.

-УИХ дахь сөрөг хүчний намууд ТӨК-иуд дээр хүмүүсээ томилуулсан гэх асуудал яригдаж байна. Үнэн үү?

-ТӨК-иуд дээр ХҮН нам болон Ардчилсан намаас хүмүүс санал болгоод томилуулж байгаа нь үнэн. ХҮН намаас хэдэн хүн томилуулсныг сайн мэдэхгүй байна. Хоёр зүйл хэлье. Нэгдүгээрт, бид улс төрийн албан тушаалд ганцхан намаас буюу МАН-аас томилсоор байгаад дасчихаж. Яахаараа бүх асуудлыг ганцхан нам шийдэх ёстой юм бэ. АН, ХҮН намаас санал болгосон мэргэжлийн хүнийг томилох нь буруу биш биз дээ. Тэр хүмүүс бүгд мэргэжлийн хүмүүс. Өөрөөр хэлбэл намын гэхээсээ  илүү тухайн ажлыг сайн хийж чадах хүмүүсийг санал болгож томилж байгаа.

-Энэ асуудлыг одоо байгаа орон тооны хүрээнд шийдэж болоогүй юм уу. Яагаад заавал орон тоо нэмж бий болгох ёстой юм бэ?

-Төрийн өмчит компаниуд бол Монгол улсын хөгжлийн, бүтээмжийн гол асуудал болчихоод байгаа нь үнэн. Энийг шийдэхийн тулд одоо байгаа арга барилаа өөрчлөхөөс өөр арга байхгүй. Ингэхийн тулд шинэ хүмүүс оруулах ёстой. Тийм учраас Хамтарсан Засгийн үед салбарынх нь мэргэжилтнүүдийг оруулах нь зөв. Энэ асуудлыг ХҮН нам дэмжиж ажиллаж байгаа.

-Бүтээмжийн менежер гэдэг шинэ ажлын байр бий болгож байгаа нь зөв үү. Нийслэлийн ХҮН намын дарга Д.Золзаяа Улаанбаатар хотын даргын Утааг бууруулах төслийн бүтээмж дээшлүүлэх менежерээр томилогдсон байна. Яг мэргэжлийн хүн мөн үү?

-Д.Золзаяа бол яг хотын мэргэжлийн хүн. Дээр нь ХҮН намын Нийслэлд хэрэгжүүлэх хөтөлбөрийг боловсруулсан хүн.

-АТГ-ын даргыг улираах асуудлыг ХҮН намын зөвлөл дэмжиж байгаа юу?

-Зөвлөл яг одоо хуралдах гэж байна. Ерөнхий сайд үндэслэлээ танилцуулах байх, дараа нь энэ асуудлаар байр суурь илэрхийлье.

-П.Наранбаяр сайдтай үүсгэсэн асуудал юу болсон бэ. Үнэндээ яг ямар асуудал байв?

-Би өнгөрсөн пүрэв гарагт эмнэлэгт хэвтэж, төлөвлөгөөт хагалгаа хийлгэсэн юм. Гараад иртэл гадуур зохиомжилсон, зодоон болсон мэт ардын аман зохиол шиг юм явчихаж. Тийм юм болоогүй ээ.

-Яг юу болсон юм бэ?

-Өглөө зөвлөлийн хурал дээр болсон асуудал. Орой, архи дарстай асуудал огт болоогүй. Би өдөр нь эмнэлэгт хэвтээд явчихсан шүү дээ.

-Нэг гишүүн, нөгөө гишүүнийхээ эрхэд халдсан асуудал юм биш үү. Цагдаа дээр дуудлага ирсэн байсан шүү дээ?

-Ямар ч байсан зодоон цохион болоогүй. Ёстой санамсаргүй тохиолдол болчихсон. Хүний нүд рүү гараа хийдэг шиг л юм болсон.