Ө.Шижир: Ард иргэд байгалийн баялагтаа эзэн байх ёстой. Засгийн газрыг 100 хувь дэмжинэ

УИХ-ын гишүүн Ө.Шижирээс цаг үеийн асуудлаар тодруулга мэдээлэл авлаа. 

Тэрбээр УИХ-ын чуулганы үеэр ХҮН нам сонгуулиар 1.9 тэрбумын санхүүжилт авсан талаар дурдаж  үүнийг хуульчилсан авлигал хэмээн өөрийн байр сууриа илэрхийлсэн юм. 

-УИХ-ын чуулганаар хэлсэн үг тань анхаарал татлаа. Сонгуульд нэр дэвшсэн хүнд нэг компани нэг тэрбум төгрөгийн хандив өргөсөн байна. Үүгээрээ УИХ-ын гишүүд нэг компаниас хараат байна гэх асуудлыг хөндлөө. Үнэхээр тийм зүйл байна уу?

-Би өөрийнхөө хэлсэн үгэнд 100 хувь хариуцлага хүлээнэ. Энэ бол үндэсний аудитын газарт өгсөн тайлан дээрээс нь харсан тоон мэдээлэл.

Улс төрийн намын санхүүжилтийг бид хуульчилсан. Тодорхой хэмжээний дээд хязгаарыг ч зааж өгсөн. Гэхдээ хуулийн цоорхой ашиглаад ч гэх юм уу Энержи ресурс компани өөрийнхөө хамаарал бүхий 36 компаниудаар дамжуулаад ХҮН намд 1 тэрбум 45 сая төгрөгийн хандив өгсөн. Энэ ХҮН намын тухайн сонгуулиар босгосон хандивынх нь 98 хувийг эзэлж байгаа юм. Тэгэхээр энэ нам 100 хувь тухайн компанийн хараат гэж хэлж болно.

-Таны хувьд Засгийн газраас хэрэгжүүлж байгаа стратегийн ордуудын 34 хувийг төр авах асуудал дээр ямар байр суурьтай байгаа вэ?

- Ер нь баялгийн сангийн тухай хууль хэрэгжих ёстой. Нийт Монголчууд бидэнд өв уламжлагдаж ирсэн энэ газар нутаг дээр байгаа баялгаас ард түмэн үр ашиг хүртэх ёстой гэдэг дээр би 100 хувь санал нэг байгаа.

Өнөөдөр Засгийн газрын нэгдүгээр хавсралтад байгаа УИХ-ын тогтоолын 16 ордын зургаа нь л төрд байгаа. Ес нь хувьд байгаа. Нөгөө 39 ордын 20 гаруй нь хувьд байгаа. Тиймээс бид үүнийг заавал баялгийн сангийн тухай хуулиар хэлэлцээр хийх ёстой. би бол Засгийн газартай 100 хувь санал нэг байгаа. 

-Төгрөг нуурын ордтой холбоотой асуудал дээр Ерөнхийлөгч асан Х.Баттулга холбоотой гэх мэдээлэл бий. Та үүн дээр ямар байр суурьтай байна вэ?

-Төгрөг нуурын ордтой холбоотой асуудал дээр Х.Баттулга гэдэг хүн яаж холбогдсоныг мэдэхгүй. Н.Учралын мэдээллээс л сонссон. Гэхдээ хэн ч бай хамаагүй адилхан л хариуцлага хүлээх ёстой.