Г.Отгонтуяа: Миний хувьд 9 сарын 1 зүрхийг минь хамгийн их өвтгөдөг өдрийн нэг болжээ

Бусдын гарт хэрцгийгээр амь насаа алдсан 16 настай охины ээж өөрийн цахим хуудаснаа ийнхүү бичжээ.

Тэрбээр, "Юуны өмнө Эрдмийн баярын мэндийг өдөр хоног тоолон, тэсэн ядан хүлээж баярлан угтаж байгаа бүхий аав ээж, аз жаргалтай хүүхдүүддээ аз жаргал, сурлагын өндөр амжилт хүсэн ерөөе.

Есдүгээр сарын 1-ний
Энэ өдөр Монгол хүн бүрийн хувьд эрдмийн их өргөөний хаалга нээгдэж, хүүхэд багачууд мөрөөдөлдөө хөтлөгдөн алхдаг хамгийн сайхан өдөр. 

Есдүгээр сарын 1…
Хүүхдийн инээд цангинаж, сургуулийн хонх жингэнэж, эцэг эх, асран хамгаалагч бүрийн сэтгэл догдолдог энэ өдөр Монгол хүн бүрийн хувьд хамгийн гэгээн өдрүүдийн нэг.
…Харин миний хувьд энэ өдөр зүрхийг минь хамгийн их өвтгөдөг өдрийн нэг болжээ.

Бусдын хүүхдүүд сургуулийн босго алхаж, шинэ дэвтэр номоо үнэрлэн догдолж байхад миний үр энэ хорвоод байхгүй.Өнөөдөр би үрийнхээ гараас хөтлөөд сургуульд нь хүргэж өгөхгүй.Амжилт бүтээлээр нь бахархаж, ирээдүйнх нь тухай мөрөөдөхгүй. 

Миний үрийн амьдрал асар богинохон байсан хэдий ч надад хайрлахын утга учрыг үлдээж.Тиймээ, би уй гашуудаа сөхрөхгүй. Үрийнхээ гэгээн дурсгалыг тээж, үлдсэн амьдралаа бусдын хүүхдийн төлөө зориулна.Эх хүний хайр хэзээ ч үгүй болдоггүй юм байна.Үрдээ зориулах байсан бүх хайр, халамж, энэрэл минь зүрхэнд минь хэвээрээ үлдсэн.

Тэр их хайрыг би цаашид бусдын хүүхдүүдэд, тэр дундаа хамгийн их ойлголт, дэмжлэг хэрэгтэй байдаг хөгжлийн бэрхшээлтэй хүүхдүүдэд зориулна. Монголын хүүхэд бүр айх аюулгүй, амар амгалан аз жаргалтай байж, хүүхэд бүр үргэлж инээмсэглэж, ээж бүрийн нүдэнд баярын нулимс цийлэгнэж байвал, тэнд миний үрийн хайрын нэг хэсэг амьдарч байна гэж би итгэнэ.

Өнөөдөр би ганц үрээ үгүйлэн нулимс унагаж байна. Гэхдээ тэр нулимс зөвхөн уй гашуугийнх биш. Энэ бол үрээсээ өвлөж үлдсэн хайраа бусдад түгээх тангарагийн нулимс юм.Би охиныхоо гэгээн дурсгалыг зүрхэндээ тээж, үлдсэн амьдралаа хүүхэд бүрийн төлөө зориулсаар байх болно.
Хүн бүр хүүхдийн инээдийг хамгаалж чаддаг нийгэмтэй болохын төлөө, хүүхэд бүр ялгаагүй хайрлагдаж, ойлгогдож, хөгжих боломжтой байх тэр өдрийн төлөө би өөрийн үлдсэн бүх мэдлэг боловсрол, хүч чадлаа зориулна. 

Миний охинд зориулагдах байсан хайр тэдэнд хүрэг.

Миний охинд зориулагдах байсан халамж тэдний ирээдүйг гэрэлтүүлэг.

Миний охинд зориулагдах байсан мөрөөдөл хэн нэгэн хүүхдийн инээмсэглэл болон үргэлжлэг.

Охиныхоо нэрээр, охиныхоо мөрөөдлийн төлөө, тусламж хэрэгтэй байгаа хүүхэд бүрийн төлөө босно.
Хүүхэд бүр аюулгүй, хүүхэд бүр хамгаалагдсан, хүүхэд бүр хайрлагдсан нийгмийн төлөө би дуугарах болно" гэжээ.