“УИХ-ын гишүүн Б.Чойжилсүрэн ашиг харж иргэдийг хохироож байна” гэв

Хотын төвийн өнгөтэй өөдтэй газрууд “Хурд” группын эзэмшилд байдаг. Эдний нэг болох “Хүннү 2222 residence” хорооллийн нэгдүгээр ээлж болох 1,380 айлын орон сууц ашиглалтад ороод таван жилийн хугацаа өнгөрсөн. Тэгвэл II дугаар ээлжийн барилга ирэх онд ашиглалтад орохтой зэрэгцээд иргэдээс гомдол ирсээр байна. Үүнээс сургууль, цэцэрлэгтэй холбоотой маргаан, гомдлын мөрөөр бид иргэдтэй уулзаж, дараах сурвалжлагыг бэлтгэлээ.

Улсын гэх тодотголтой сургууль, цэцэрлэгийг хорооллын төлөвлөлтөд багтаасан ч хэрэгжих боломжгүй болжээ

“Хурд” группын барьж буй орон сууцны хороолол бусад хорооллын орон сууцны төлөвлөлтөөс илүү давуу талуудтай гэдгээ байр ашиглалтад орохоос өмнө иргэдэд сурталчилж байв. Үүндээ улсын сургууль, цэцэрлэгтэй, эко орчин, ногоон байгууламжтай, худалдаа үйлчилгээний нэгдсэн төвийг цогцлоосон, авто машингүй, аюулгүй, хүүхэд цэвэр орчинд тоглож наадах, ээлтэй ногоон орчныг төлөвлөсөн гэх зэрэг олон давуу талуудыг дурдсан байв.

Дээр дурдсанаар, тус хороолол өнгө үзэмжийн хувьд сайхан ч гэлээ чанарын хувьд бусад барилгаас ялгаагүй гэдгээ нэгдүгээр ээлжийн орон сууцны барилгын чанараар харуулаад байгаа юм. Учир нь тус байр дулаан алддаг, хана цонхноосоо сийгдэг төдийгүй паркетэн шалны хооронд үүссэн зай завсар, хөндийрч гарч ирсэн дүр зураг, алхах бүрт шал чихарч дугардаг эсэхийг дурдаад ч хэрэггүй биз.

Уг нь анх төлөвлөлтөндөө чанарыг эрхэмлэнэ хэмээн тусгаж байсан ч эсийг үл олсон бололтой. Барилгын чанар, хийц ч дүүрч хамгийн анхаарал татах зүйл нь улсын гэх тодотголтой сургууль, цэцэрлэгийг хорооллынхоо төлөвлөлтөд багтаасан байгаа юм.

2020 оны 11 дүгээр сарын 6-ны өдөр “Хурд” групп өөрийн албан ёсны фэйсбүүк хуудастаа “Хүннү 2222” хорооллын газар дээр хувийн хөрөнгө оруулалттай сургууль байгуулах талаар хамтран ажиллахаар тохиролцлоо. Тухайн газар дээр та бүхний хэрэгцээ шаардлагад нийцсэн, шинэлэг орчин үеийн, бүрэн дунд сургууль баригдах бөгөөд урьдчилсан байдлаар 2021 оны хичээлийн жилд амжуулан ашиглалтад оруулахаар төлөвлөж байгаа юм байна. Сургуулийн дүүргэлтээс хамааран эхний ээлжинд бага сургуулийн хэсгийг ашиглалтад оруулж улмаар дунд ахлах ангийн элсэлт авч эхлэх юм байна” хэмээн нийтэлсэн байдаг.

Уг нь анх улсын сургууль, цэцэрлэгийг 2015-2016 оны хооронд ашиглалтад оруулна гэж цагаан цаасан дээр хараар тодоос тод бичсэн байдаг. Худалдан авагчдын анхаарлыг улсын гэх тодотголтой сургууль, цэцэрлэгийн байгууламж ихээхэн татаж, тус орон сууцыг худалдан авахад нь нилээдгүй түлхэц болсон байгаа юм.

Нэг талаараа сайн маркетинг хийж, худалдан авагчдыг хохироосон мэт харагдсаар байна. Нэгдүгээр ээлжийн байр ашиглалтад орох үедээ улсын гэх тодотгол бүхий цэцэрлэгийг барьсан байдаг. Уг цэцэрлэг ашиглалтад оролгүй нилээд хугацааг үдсэн. Гэтэл “Хурд” группээс гэнэтийн мэдээлэл хийсэн нь оршин суугчдыг ихэд бухимдуулжээ.

Тус мэдээлэлд улсын цэцэрлэгийг хувийн өмчит шилжүүлэх талаар дурдсан байдаг. Цэцэрлэгийн барилгын ажил бүрэн дууссан ба улсад 5-6,5 тэрбумаар өгөх шийдвэрийг “Хурд” групп гаргасан ч улс шийд өгөөгүй учир ийнхүү хувийн өмчит шилжүүлсэн гэжээ.

“Биднийг өндөр төлбөртэй хувийн сургуульд хүүхдээ сургахаас өөр сонголтгүй болгож байна”

Дээрх цэцэрлэгийн жишигтэй дүйцэхүйц 100 ортой хүүхдийн цэцэрлэгийг улсын төсвөөр 1-1,5 тэрбум төгрөгөөр барьдаг аж. Гэтэл “Хурд” групп яагаад улсад тийм өндөр үнэ хэлэх болов.

Улсын гэх тодотголтой цэцэрлэг хувийн өмчид орсноор оршин суугчид хүүхдээ өндөр төлбөртэй цэцэрлэгт явуулахаас өөр сонголтгүй болсон байгаа юм. Нэгэнт цэцэрлэг хувийнх болсон тул одоо яах ч аргагүй. Харин одоо баригдах мөн л улсын гэх тодотголтой сургуулийг хувийн өмч болгохгүй байх юмсан хэмээн оршин суугчид харамсангуй хэлж байв.

Төлөвлөлтөд зааснаар сургууль барих газар хэвээр байгаа ба шаваа тавиагүй байгаа аж. Хүн амьжиргааны түвшнээсээ хамаараад хүүхдээ улсын болон хувийн сургууль, цэцэрлэгт өгдөг ч тус хорооллын төлөвлөлтдөө тусгасан улсын сургуулийг улсын гэх тодотголтой хэвээр нь байлгах нь зүйтэй гэдгийг тэд онцолж байлаа.

Дээрх асуудлаар оршин суугч Т-гээс тодруулахад “Манай хорооллыг тойроод хувийн сургууль болох Орчлон, Интернэшнл, Хобби зэрэг өндөр төлбөртэй сургуулиуд байрладаг. Хүүхэд маань гэрээсээ гараад улсын сургуульд орвол нэгдүгээрт, өрхийн зардалд хэмнэлттэй, хоёрдугаарт, хүүхэд маань хол явахгүй ойрхон, аюулгүй орчинд байна гэж бодож байсан. Би хүүхдээ хувийн сургуульд өгөөд боловсролд нь анхаарч болж байгаа ч, энд улсын сургууль баригдах нь зүй ёсны зүйл. Б.Чойжилсүрэн ашгаа бодохоос, хүнээ боддоггүй хүн байгаад байна. Үүн дээр ганцаараа би дугараагүй, асуудал гарахад бүгд дугарсан, дургүйцсэн. Ямартай ч улсын сургуулиа бариулах ёстой шүү гэсэн үзэл бодолтой, үүн дээрээ бат зогссон байгаа. Би Хурдад 360 сая төгрөгийг өгчихөөд хохирмооргүй байна” гэлээ. 

Улсын гэх тодотгол бүхий сургуулийн газар, төлөвлөлт хийгдсэн байдлыг доорх зурагнаас харж болно. 

Эл асуудлаар бид “Хурд” групп-ээс тодруулга авч, дахин мэдээлэх болно.

Н.Мөнхжин