Лу.Гантөмөр: МОАХ-нд элссэн АН-ын гишүүн залуусаас УИХ-д нэр дэвшүүлнэ, хууччуултай нь бол ярих юм бага байгаа

Ардчилсан намын дарга Лу.Гантөмөрийн сэтгүүлчдэд өгсөн нээлттэй мэдээллээс уншигчдадаа хүргэж байна.    

 “Манай намын удирдлага бүх суманд очиж, иргэдэдээ “Өрийн дарамтгүй болохын тулд юу хийх вэ” гэдэгт ойлголтоо нэгтгэж, төвлөрч ажиллаж байна. Бид газар дээр нь хүрч очоод яг бодит байдал дээр эмч хүн өргүй байхын тулд юу хийх, багш хүн юу хийх, малчид олсон орлогоороо сайхан амьдардаг тэр орчныг бүрдүүлэх, бүгд өргүй байхын тулд бид юу хийх вэ, энэ улс орон өргүй байхын тулд яах вэ гэдэг асуудлыг “Өрийн дарамтгүй Монгол” хэлэлцүүлгээр ярилцаж, гарч байгаа саналуудыг нэгтгээд явна. 

Хэлэлцүүлэг гурван үе шаттай байна. Бид найман жил эрх барьсан улс төрийн хүчинтэй хэрэлдэж зодолдохоос илүү өөрсдөө иргэдтэйгээ тулж ажилана. Бидний парламентад байгаа хүчийг та бүхэн мэдэж байгаа, 10 суудалтай. Нэг удаа завсарлага авах эрхтэй, өөрөөр бид эрх баригчдийн хийж байгаа буруу зүйлийг зогсоох боломж алга. Хамгийн гол нь бид ирэх сонгуульд амжилттай оролцож байж тэдний 8 жилийн туршид хийсэн алдааг засч, хэрэг төвгийг шалгаж, өр үүсгэж байгаа хүчин зүйлийг зогсооно... 

Хамгийн гол өр үүсгэж байгаа зүйл бол төсөв. Төсвийг бид эхлээд хямгадна. Дарга нарын зардал багасах ёстой. Энэ бол хатуу байр суурь. Төсөв хямгадаж, дарга нарын зардал багасахаар нөгөө талдаа мөнгөний бодлого суларна. Өнөөдөр 13%-ийн бодлогын хүү тавьж байгаа нь маш буруу. Энэ нь үндсэндээ монголчууд бизнес хийхийг хориглосон хууль, хориглосон бодлого болж байгаа юм. Жишээлбэл “НӨАТ” бол үнийн өсөлтийг улам хөөргөж байгаа том хэрэгсэл болчихлоо. Тэгэхээр ард түмэн НӨАТ-ыг 5%-ийн  татвар болгооч ээ гэдэг нь бодитой юм. Ардчилсан нам, Б.Пүрэвдорж гишүүн НӨАТ-ын тухай хуулиа өргөн барьж байна. Үүнийг Ардчилсан нам нэгдмэл 5%-руу явах бодлого гэж ойлгох хэрэгтэй. Нийгмийн даатгалын шимтгэл дээр ч гэсэн алдаануудыг засах учиртай. Төсвөө бид хямгадъя, мөнгөний бодлогоо зөв болгоё, хөрөнгө оруулалтын орчноо сайжруулъя, дээр нь бирж гэдэг асуудлыг амилуулах ёстой. Биржийг амилуулахын тулд улсын үйлдвэрийн газар нэрээр дарга нарын хөрөнгөжөөд байгаа, төрийн хөрөнгөтнүүд төрөөд байгаа, төр нь өөрөө олигарх болчихсон, УИХ-ын гишүүд нь ядуу хүн байж байгаад олигарх болчихдог тэр зүйлийг зогсоох ёстой. Сайд нар нь олигарх болчихдог энэ асуудлыг таслан зогсоохын тулд маш оновчтой санхүүгийн зохицуулалтыг бий болгоно. 

Ирэх оны төсөв хөөсөрсөн алдагдалтай байлаа гэхэд эргээд том том үйлдвэрүүд босоод ирэх ёстой. Нөгөө хөдөө аж ахуйн бирж, хөдөө аж ахуйн үйлдвэрлэлийн парк, нөгөө Сайншандын парк гээд чухал юманд хөрөнгө оруулж байвал бид ойлгоно. 

Харин чухал биш аравхан машин явдаг газар зам тавьдаг, 100 хүн цугласан газар 500 хүний соёлын төв байгуулдаг, хүн очихгүй эргэлтэнд орохгүй газар руу монгол төрийн мөнгийг зарцуулж байгаа нь, элс рүү ус хийж байгаатай адил цацаж байгаа нь үнэхээр харалган байна. Энэ төсвийн хууль ирэх жил хэрэгжихгүй. Орлого, зарлага нь ч бүтэлгүйтэх байх. Бэлэн мөнгө тараах ажил руу энэ хүмүүс явах гэж байна. Ирэх жил сонгууль угтаад 1, 2 их наядыг тараана. Тараах аргаа яаж гаргаж ирэх гэж байгааг бид сайн ойлгохгүй.

4 жил сонгогчдоосоо холдсон хүмүүс одоо гэнэт очоод за би бүх юмыг чинь бариад өгье гэдэг худлаа, боломжгүй. Монголын энэ том газар нутагт гуравхан сая хүнд зориулаад бүх хүнд зориулсан мөнгөний урсгал хийх юм бол ямар их хохиролтойг бид өнгөрсөн 10 жилд харчихлаа. Хангалттай харлаа. Одоо эндээс ойлгох хэрэгтэй. Зүгээр л “Эрх барина, дарга болно” гэсэн ийм хууль, ийм бодлого цаашаа явж болохгүй.

3.3 их наяд гэдэг бол 45 мкв орон сууцаар бодоход 200,000 айлын орон сууц юм. Энэ бол Улаанбаатарын утааны асуудлыг шийдэх мөнгө. Гэтэл хөрөнгө оруулалтын асуудлаас гадна төрийн байгууллагуудын урсгал зардал, үйл ажиллагааны зардал 3.6 их наяд төгрөг явж байна. Дарга нар хувааж идэх мөнгө нь ийм хэмжээнд оччихсон байна. Монголын бүх асуудлыг шийдэх, бүх өрийг төлөх, мөнгөөр зүгээр л дарга нар өөрсдийгөө пи ар-ыг хийх, гадагшаа, дотогшоо зугаалах, хурал нэртэйгээр мөнгө угаах, хэтэвчээ зузаатгах ийм л ажлыг хийх гэж байна. Түүнээс үүн дотор бүтээлч юм нэг ч алга. 

ЕНБД-ыг хотын намын даргыг томилсны дараа томилно. Эхлээд хотын намын хорооны гишүүдийн нөхөн сонгууль явагдана, сумын удирдах зөвлөлүүд байгуулагдна. Ингэсний дараа хотын намын хороо хуралдаж нийслэлийн намын даргаа томилно. Үүний дараа би ЕНБД-ыг томилно. Ийм төлөвлөгөөтэй байна. Ер нь Ардчилсан намыг хуваах гэсэн оролдлого, МАН-ын туршуулууд манай намаар дүүрэн байна. Өнөөдөр хүртэл энэ гадна, дотны нөлөөгөөр Ардчилсан намыг муулдаг, доромжилдог үйлдлүүд манай намын гишүүдээс маш их хэмжээгээр илэрч байгаа. Би өнөөдөр ЕНБД-аа томилохгүй, 30 нэгжийнхээ бүтцийг хийж авах нь намын даргын хувьд журамт үүрэг. Энэ намыг нэгтгэх нь минйи хувьд үүрэг. Эхний ажлынхаа гуравдах шатыг давчихлаа, одоо ингээд бүтэц, бүрэлдэхүүнээ хийж байна.

Мэргэжлийн хүмүүс эхлээд ложистикоо хийдэг. Бид ложистикийн алдаанаасаа болоод юмны үнэ нь өсчихсөн буцаагаад ложистик засарчихаад байхад үнэ буухгүй байгааг л хүмүүс гайхаад байгаа юм.  Түүн шиг Ардчилсан нам ложистикоо 2020 оны сонгуулиар л алдчихсан байсан. Өнөөдөр хүртэл биднийг хуваагаад ложистикгүйгээр сонгуульд оролцуулах санаатай байна. Тэгхээр миний хувьд эхлээд хийх ажил бол сум, аймаг, хороо, дүүрэг дээрх бүтцээ хийж сайжруулах юм. Үүнтэй зэрэгцээд 90,000 айлд орж уулзаж байна, бид заавал хэвлэл мэдээлллээр популизм хийхээс илүүтэй уначихсан байгаа намын сул талыг засах гэж оролдож байна. Ингээд заслаа авчихна, бидэнд ирэх сонгуулийг амжилттай давах итгэл үнэмшил байгаа тул та бүхэн битгий санаа зовоорой.

МОАХ-аас гадна ардчиллын анхдагчид гэж хүмүүс бий, жирийн олон анхдагчид бий. Энэ хүмүүсийг бид ардчилсан намынхаа төвд байлгана. Би өөрөө МОАХ дээр очиж уулзалтууд хийнэ. Бидний хувьд энэ намыг хуваах гэсэн сонирхлыг хаахын тулд бүх үйлдлийг хийж байгаа. МОАХ намаа дэмжиж сонгуульд оролцоно. Үүнд би эргэлзэхгүй байна. Энэ зүйл дээр ямар нэгэн шантааж ирээгүй гэдгийг дахин хэлэх хэрэгтэй. МОАХ-ын гишүүнээр элсчихээд Ардчилсан намын гишүүн учраас УИХ-д дэвших сонирхолтой залуучууд олон байна. Энэ залуусыг дэвшүүлнэ, хууччуултай бол ярих юм бага байгаа”.