Эрүүл мэнд, нийгмийн даатгалын ерөнхий газрын Нийгмийн даатгалын шимтгэл төлөлтийн тайланд 2016 оны дөрөвдүгээр улиралд нийт 37.3 мянган аж ахуйн нэгж, байгууллагын 577.9 мянган ажиллагчид хамрагджээ. Эдгээр ажиллагчдын 4.9 хувь нь 192 мянган төгрөг хүртэлх цалинтай байгаа бол есөн хувь нь 192-300 мянга, 16.1 хувь нь 300-500 мянган төгрөгийн цалинтай байгааг ҮСХ мэдээллээ. Мөн нийт ажиллагчдын 37.8 хувь нь 500-900, 17 хувь нь 900 мянгаас нэг сая 300 мянган төгрөгийн цалинтай байхад 1.3-1.5 сая төгрөгийн цалинтай ажиллагчид 3.9 хувь харин 1.5 саяас дээш төгрөгийн цалинтай нь 10.5 хувийг бүрдүүлж байна. Түүнчлэн нэг ажилтанд ногдох сарын дундаж цалин тайлант хугацаанд 942.9 мянган төгрөг болж өмнөх оны мөн үеэс 8.6 хувиар, өмнөх улирлаас 6.6 хувиар өссөн болохыг ҮСХ мэдээллээ. Дундаж цалинг салбарын ангиллаар нь авч үзвэл уул уурхай, олборлолтын салбарт ажиллагсдынх хамгийн өндөр буюу 2.3 сая төгрөг харин өрхийн үйл ажиллагааны салбарынх хамгийн бага буюу 626.3 мянган төгрөг байна.
Үүнээс гадна ОУВС-ийн ;Өргөтгөсөн санхүүжилтийн хөтөлбөр-ийг хэрэгжүүлэх болсноор Монгол Улс төсвийн орлогоо нэмэгдүүлж, зарлагаа танах шаардлага үүсээд байгаа юм. Энэ хүрээнд нийгмийн даатгалын шимтгэлийг 2018 онд хоёр хувиар, 2019 онд нэг хувиар, 2020 онд хоёр хувиар нэмэгдүүлэх шийдэлд хүрсэн талаар Сангийн сайд танилцуулж байсан. Мөн 2018 оны нэгдүгээр сарын 1-ээс эхлэн хувь хүний орлогын түвшнээс хамааруулж шатлал тогтоон 10, 15, 20, 25 хувиар орлогын албан татвар ногдуулах хувилбарыг мөн Сангийн сайд танилцуулсан. Энэ хүрээнд 1.5 сая хүртэл төгрөгийн цалинтай хүмүүсийн орлогын татвар 10 хувь хэвээрээ байхаар байгаа юм. Харин 1.5-2.5 сая төгрөгийн цалингийн ХХОАТ 15 хувь, 2.5-3.5 сая төгрөгийн цалингийн 20 хувь, 3.5 саяас дээш төгрөгийн цалингийн 25 хувь болж өсөх урьдчилсан тооцоолол байна.
Сэтгэгдэл бичигдээгүй байна