Наадмын нэг өдрийн тасалбарыг 42,500-52,500 төгрөгөөр борлуулна

Үндэсний их баяр наадмын зохион байгуулах хорооноос наадмын нээлт болон хаалтын үйл ажиллагаа, үндэсний бөхийн барилдаан үзвэрийн тасалбар, автомашины зогсоолын зөвшөөрлийг хэрхэн хуваарилах талаар дараах мэдээллийг өглөө.  

Өмнөх жилүүдэд наадмын хоёр өдрийн тасалбар багц үнээр борлуулагддаг байсан бол энэ жил хоёр өдрийн тасалбарыг тус, тусад нь борлуулахаар болжээ. Нэг хэрэглэгч нэг өдрийн тасалбараас хамгийн ихдээ хоёр ширхэг буюу хоёр өдрийн тасалбараас нийлээд дөрвөн ширхэгийг авах боломжтой. Мөн автомашины зөвшөөрлийг нэг хүнд тав хүртэлх тоогоор олгох зохицуулалт хийсэн байна. Тасалбарыг долоодугаар сарын 1-10 хооронд “Монгол шуудан” ХХК хүргэлтээр бүртгэлтэй хаягаар болон монгол шуудангийн салбараар авч болох аж. 

• Сүүдрэвчтэй суудал- 52500 төгрөг
• Сүүдрэвчгүй суудал- 42500 төгрөг
• Автомашины зөвшөөрөл- 21000 төгрөг

Наадмын тасалбар цахимаар захиалахтай холбоотой дараах мэдээллийг хүргэж байна. 

• enaadam.mn сайт руу нэвтэрч захиалга хийхээс өмнө хэрэглэгчийн бүртгэл үүсгэсэн байх. Урьдчилаад enaadam.mn руу нэвтрэн утас, гэрийн хаягийн бүртгэлийг хийлгэсэн байхыг зөвлөж байна
• Наадмын хоёр өдрийн тасалбарыг тус тусад нь борлуулах ба хэрэглэгч нэг өдрийн тасалбараас хамгийн ихдээ хоёр ширхэг буюу хоёр өдрийн тасалбараас нийт дөрвөн ширхэгийг авах боломжтой. Харин автомашины зөвшөөрлийг нэг хүн тав хүртэлх тоогоор авч болно 
• Тасалбар төлөх хугацаа нэг цагийн дотор тул та яаралгүй төлбөрөө төлснөөр банк болон төлбөрийн системд ачаалал үүсгэхгүй хэвийн ажиллах боломжтой
• Тасалбарыг долоодугаар сарын 1-10-ны хооронд “Монгол шуудан” ХК нь иргэдийн бүртгэлтэй хаягаар болон шуудангийн салбаруудаар хүргэж үйлчилнэ
• Тасалбар болон автомашины зөвшөөрлийн үнэ дээр хүргэлтийн төлбөр нэмэгдэхийг анхаарна уу
• Төлбөр төлөхдөө Qpay, Social Pay төлбөрийн хэрэгслүүдийг ашиглах боломжтой

Захиалга баталгаажихгүй байх шалтгаан 

• Таны төлбөр амжилттай болоогүй буюу банкны гүйлгээ, интернэтийн тасалдал зэргээс шалтгаалан төлбөрийн гүйцэтгэл дээр саатал үүсэх
• Захиалга баталгаажуулах хугацаа өнгөрсөн
• Төлбөр төлөх утгыг буруу оруулсан /дансаар төлсөн тохиолдолд/
• Төлбөрөө дутуу төлсөн тохиолдолд баталгаажихгүйг анхаарна уу. Амжилттай төлөгдлөө гэсэн төлөвийг заавал шалгах шаардлагатай