Сэлбэ голыг нарийсгаж боосон гайг Б.Чойжилсүрэн тэргүүтнүүд тарьж, лайг нь цагдаа, онцгойгийнхон үүрч байна

Олон хоног үргэлжилсэн борооны улмаас Улаанбаатар хотын нам дор хэсэг буюу 32-ын тойрог-Долоон буудал, Дарь эхийн уулзвар-Бэлх хүртэлх автозамын хооронд оршин суух айл өрхүүд усанд автаж, их хэмжээний хохирол амсаад байна. Найрамдал, Энхтайван, Нарны гүүрийн хооронд орших Натур төв, 120 мянгат, 19 дүгээр хороолол мөн усанд автаж, сул тал нь тодорхой болсноор тухайн байршлын үл хөдлөх хөрөнгийн үнэлгээ унажээ. Үерийн улмаас учирсан хохирлын хэмжээ одоогоор тодорхой болоогүй ч шалтгаан нь голын годирлыг тодорхой хэсгүүдэд хязгаарлаж, нарийсган боосноос болсон нь тодорхой байгаа юм. Тодруулбал, орон сууцны хорооллуудыг гол хэт тулгаж барьснаас болсон байна. Монголд голын эрэгт барилга барих зөвшөөрлийг маш том компани, эсвэл улс төрд нөлөө бүхий этгээдийн эзэмшдэг компани л авч чаддаг. Тэгвэл яг ийм, тэр хэрээрээ өнөөдрийн үүссэн нөхцөл байдалд буруутай этгээд бол Эрчим хүчний сайд Б.Чойжилсүрэн гэдгийг учир мэдэх хүмүүс хэлж байна. Тодруулбал, Сэлбэ голын эрэг орчимын газарт шуналын нүдээ тусгаж, урсгалыг нь нарийсган далан барьж зүрхэлсэн анхны, гол этгээдүүдийн нэг нь Б.Чойжилсүрэн аж.  

Сэлбэ голыг үндсэндээ Сансар гарден хороолол, Нарны хороолол, Алтай хотхон гэх мэт орон сууцны хороолол шахан нарийсгасан бөгөөд дээрх хотхоны хэсэгт голын ус нарийсан гүнзгийрч, далангаа даван, улмаар дээд буюу ертөнцийн зүгээр зүүн талд нь орших орон сууцны хотхонуудыг усанд автуулж байгаа. Тэгвэл Нарны хороолол, Сансар гарден зэрэг голын эргийн барилгууд Б.Чойжилсүрэнгийн хамаарал бүхий “Хурд” групп, “Хаус инвест” ХХК-ийнх.

Сүүлийн компанийг Б.Чойжилсүрэн эхнэртэйгээ хамтарч эзэмшдэг гэх бөгөөд “Сансар гарден” хотхоноо барихдаа Архитектур, төлөвлөлтийн даалгвар буюу А даалгаваргүйгээр эхлүүлж, энэ хэрэг нь мэдэгдмэгц төрийн албан хаагчдыг авлигадан амыг нь хамхисан гэх мэдээлэл хэвлэлээр гарч байв. Товчхондоо, Сэлбэ голыг боож үерлүүлсэн хотхон ч, усанд нь автаж живсэн хотхонууд ч түүний барьсан хотхон, барилгууд байна.    

Тодруулбал, Эрчим хүчний сайд Б.Чойжилсүрэн Энхтайваны гүүр орчмыг “бетонон ширэнгэ” болгож дуусгасан бөгөөд Энхтайвны гүүрээс Туул голын эрэг хүртэл эгнэх “КН” апартмент, Хаан банкны төв оффис “КВ tower”, “Наадам центр”, “Цэнгэлдэх” хотхон, Энхтайваны гүүрний баруун хойд үзүүрийн “Наран тауэр”, баруун урд үзүүрийн “Энхтайван” гэх 160 айлын хотхон, “Рапид харш” хороолол, “Академи” хотхон, “Хүннү 2222” хотхон, “Хүннү плас” хотхон, “Хүннү стандарт” хотхоныг бүгдийг нь Б.Чойжилсүрэнгийн хамаарал бүхий компаниуд барьжээ. Иргэдийг ч ихээр хохироосон болх нь эдгээр баримтаас тодорхой биз ээ.

"Сансар гарден".

Одоо бид Улаанбаатраа бүхлээр нь үерт алдахгүйн тулд Сэлбэ гол, түүний Туул голтой параллель шугамд урсдаг хэсэг болох Дунд голыг чөлөөлж, гамшгийн хэмжээнд хур тунадас унасан ч эргэ давахгүй байх хэмжээнд өргөсгөх шаардлагатай. Өөрөөр хэлбэл, нарийссэн хэсэгт байгаа барилгуудыг буулгаж чөлөөлөхөөс аргагүй. Ингэхдээ буруутай этгээдүүдэд мөн хариуцлага тооцож таарна. Тэгвэл тэр хариуцлага тооцуулах ёстой этгээдүүдийн эхний эгнээнд Эрчим хүчний сайд Б.Чойжилсүрэн байгаа гэдгийг сануулах гэсэн юм. Гайг нь Б.Чойжилсүрэн тэргүүтнүүд тарьж, лайг нь цагдаа, онцгой байдлын ажилтнууд үүрэх нь шударга биш.