Харилцаа холбооны зохицуулах хорооноос Старлинк сервисес Монголиа компанид Харилцаа холбооны үйлчилгээ эрхлэх болон Радио давтамж, радио давтамжийн зурвас ашиглах тусгай зөвшөөрөл олгосон бөгөөд тусгай зөвшөөрлийн гэрчилгээг гардуулах үйл ажиллагааг долоодугаар сарын 6-ний өдөр зохион байгууллаа.
Тус үйл ажиллагаанд УИХ-ын гишүүн, Засгийн газрын гишүүн, Цахим хөгжил, харилцаа холбооны сайд Н.Учрал, Харилцаа холбооны зохицуулах хорооны дарга Г.Чинзориг, удирдлагын багийн гишүүд болон Старлинк сервисес Монголиа компанийн төлөөлөл болох Sharon Zhang, SpaceX компанийн Засгийн газрын харилцаа хариуцсан ахлах менежер Rebecca Hunter нар оролцлоо.
Харилцаа холбооны зохицуулах хороо нь тусгай зөвшөөрлийг албан ёсоор гардуулах үйл ажиллагааг 2023 оноос эхлэн хэрэгжүүлэн ажиллаж байна. 2022 онд Зөвшөөрлийн тухай хууль батлагдаж, 2023 оноос хэрэгжиж эхэлсэнтэй холбоотойгоор зөвшөөрөлтэй холбоотой хууль эрх зүйн орчинд ихээхэн өөрчлөлт гарсан. Энэхүү хуулийг дагаж тусгай зөвшөөрлийн нөхцөл, шаардлага, холбогдох журам баримт бичгүүдэд мөн нэмэлт, өөрчлөлтүүд орж батлагдсан.
Иймд тусгай зөвшөөрлийн гэрчилгээг гардуулж өгөхдөө энэ талаарх зөвлөмж, мэдээллийг өгөх зорилготой. Нөгөө талаар Зохицуулах хорооноос олгож байгаа тусгай зөвшөөрөл нь ажлын байрыг бий болгох, хөрөнгө оруулалтыг татах, салбарын болон улс орны хөгжлийг хурдасгах өндөр ач холбогдолтой.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна