Авлигын ХОР УРШГИЙГ бид нийтээрээ АМСАЖ байна

Сэлбэ гол үерлэхэд хамгийн их нөлөөлж байгаа зүйл нь эрэг дагуух барилга, орон сууцны хорооллууд гэдгийг УОК, НОК-ын удирдлагууд онцоллоо. Харамсалтай нь дарга нар маань олон нийтийн эрх ашгийг ноцтой зөрчсөн хууль бус, ужгирсан асуудлыг өнөөдөр л ойлгожээ.

Угтаа бол мэргэжлийн хүмүүс нь хэлсээр, ярьсаар, сануулсаар, хэвлэл ч мэдээллийг дамжуулсаар ирсэн юм.

Тухайлбал, “Азидаа томд орох усан парк, амралт зугаалгын цогцолборыг байгуулна гэж байсан ч “AQUA Garden” нэртэй орон сууцны хороолол бариад эхэлсэн “Эм энд Жи” констракшн” компани Усны тухай, Ойн тухай, Газрын тухай хуулийг ноцтой зөрчсөн атал БОАЖЯ, БХБЯ, АТГ, МХЕГ зогсоох гээд дийлээгүй.

Мөн Замын цагдаагийн газрын зүүн талд байрлах S'Outlets дэлгүүрийн барилгын асуудал. Анх 2009 онд түр байр барина хэмээн таван жилийн хугацаатай газрыг эзэмшсэн ч Сэлбэ голын урсацыг хааж байгаад барьсан энэхүү барилгын асуудал үер болох тоолонд хөндөгддөг ч тэгсгээд намжсаар өдийг хүрсэн байдаг.

Товчхондоо, энэ мэтээр үерийн далан дээр, Сэлбэ голын урсцыг хааж барьсан барилгууд өнөөдөр олон хүний эд хөрөнгө, эрүүл мэндийг эрсдэлд оруулж, ноцтой хохирол учруулсан явдал бол Монголчууд авлигын хор уршгийг нийтээрээ амсаж байгаагийн илрэл, бодит дүр төрх юм.

Ямартай ч Ерөнхий сайд Л.Оюун-Эрдэнэ үер усны далан, суваг, шуудуу хааж газар олгосон, барилга барьсан, холбогдох зөвшөөрөл олгосон албан тушаалтнуудыг АТГ болон холбогдох хууль, хяналтын байгууллагад яаралтай өгч шалгуулах үүрэг өглөө. 

Мөн ерөнхий төлөвлөгөөнд тусгагдаагүй газрыг аймаг, нийслэл, дүүрэг, орон нутгийн удирдлагууд өгдөггүй байх хууль санаачлах, БХБЯ-ны Газрын харилцаа, геодези, зураг зүйн газрыг түр хугацаанд Ерөнхий сайдын дэргэд ажиллуулахыг чиглэл болгов.

Түүний үг биеллээ олбол Монголд маш үлдэцтэй, зөв жишиг тогтох нь. Өмнө нь манай улсад хороолол барьсан барилгын компанийн эзэд, тэдэнд зөвшөөрөл өгсөн албан тушаалтнууд хариуцлага хүлээж байсан түүх ховор. Дээр нь  нэгэнт баригдсан барилгыг нурааж байсан тохиолдол ч бараг байхгүй. Тийм ч учраас эхлээд барилгаа барьж, зөвшөөрлөө араас нь хөөцөлддөг гаж жишиг тогтчихсон байсан юм.

Ерөнхий сайдын шийдвэр амьдрал дээр бууж хэрэгжвэл энэ гаж жишиг үгүй болно. Мөн орон нутгийн захиргаа, салбарын яам, тэр бүү хэл Шүүх эрх мэдлийг өөртөө үйлчлүүлж байсан этгээдүүдийг дарж авснаараа Монгол Улс авлигатай жинхэнээсээ тэмцэж байгаа юм байна. Төр иргэнээ сонсдог юм байна гэсэн итгэлийг сэргээх маш чухал ач холбогдолтой юм.