СУРВАЛЖИЛГА: Сайд, дарга нар хотын төв хэсэгт анхаараад гэр хорооллынхныг “ХАЯСАН-д тэд ГОМДОЛТОЙ байна

Төрийн үйлчилгээ тэгш бус байгаа нь иргэдийг БУХИМДУУЛЖ байна

Үргэлжилсэн урт бороотой өдрүүдэд Сэлбэ гол даган суурьшсан олон айл өрх, орон сууцнууд усанд автаж иргэд эд хөрөнгө, эрүүл мэнд, сэтгэл санаагаараа хохирч байна. Манай сайтын сурвалжлах баг нийслэл хотод гамшгийн нөхцөл байдал үүссэн цагаас эхлэн газар дээрээс шуурхай мэдээллүүдийг бэлтгэж ажиллаж буй.

Үерийн бүсээс сурвалжилга бэлтгэхэд нийтлэг хөндөгсөн асуудал бол төрөөс үзүүлж буй тусламж дэмжлэг тэгш бус байгааг гэж иргэд шүүмжилж байлаа.

Үерийн гамшиг нөмөрч эхэлсэн цагаас эхлэн УОК, НОК-ынхон хамаг анхаарлаа хотын төвд төвлөрүүлж, хотын захаар оршин суугаа иргэдээ орхигдуулсныг тэдний ярианаас, гомдлоос харж болохоор... 

Үерт автсан гэр хорооллын айлууд Онцгой байдлын газарт хандсан хэдий ч хүн хүч хүрэлцэхгүй байгаагийн улмаас туслалцаа авч чадалгүй гал голомтоо орхин нүүж байна хэмээн ярьж байлаа. 

Тухайлбал, Сүхбаатар дүүргийн XXVI хороонд далан сэтэрч, үерийн усанд автсан нэгэн айлд очиход өмнөх шөнийн 02.00 цагаас эхлэн гэрт нь ус орж эхэлсэн ба хорооны Засаг дарга руугаа хэлсэн ч “Одоо яах вэ дээ” гээд тоогоогүй гэв.

Мөн 24 цагийн турш хоол ч идээгүй, гэрт нь ус орж эхэлсэн цагаас хойш усны гутлаа ч тайлаагүй байдалтай байлаа. 

Түүнчлэн тус дүүргийн 14 болон 16-р хороог нэг гол, нэг гүүр заагладаг хэдий ч нөхцөл байдал тэс өөр дүр зурагтай байв.

14-р хороо дагуу голын эргийн даланг цутгаж янзалсан учир үерийн эрсдэлээс холуур байсан бол голын нөгөө эрэгт далан барилгүй орхигдуулсан нь  иргэдийг хохироох бас нэгэн шалтгаан байв.

16-р хорооны иргэд ярихдаа хэрэв голын цаад далан байгаагүй бол ус цаашаа урсах байсан юм. Эсвэл яг адилхан далан бариад өгчихсөн бол одоо үүсээд байгаа хохирол учрахгүй байсан хэмээн ярьж байсан юм.

Тухайн даланг засаж янзлахаар Сүхбаатар дүүргийн дүйцүүлэх албаныхан мөн цагдаагийн албан хаагчид арга хэмжээ аван ажиллаж байсан ч усанд автсан айл өрхөд туслалцаа үзүүлсэн хэн ч үгүй байв.

Мөн үерт гэр орон эд хөрөнгөө хохироосон ард иргэдэд төрөөс хэрхэн тусламж үзүүлэх нь одоо ч тодорхойгүй хэвээр...

                                          /Үерт автсан гэрээ сахин үлдсэн гэр бүлийн нэгэн гишүүн/

Сурвалжилсан: Б.Алтаншагай