Хууль зөрчсөн “ХОНОГШУУЛАХ” тактик

2020 оны 05 сарын 18

УИХ-ын сонгуулийн тухай хуульд “Сонгуульд оролцохоор бүртгүүлсэн нам, эвсэл нэр дэвшүүлэх ажиллагааг санал авах өдрөөс 45 хоногийн өмнө эхлүүлж, долоо хоногийн хугацаанд дуусгана” хэмээн заасан байдаг. Хуульд заасны дагуу Монгол Улсын Их хурлын 2020 оны ээлжит сонгуульд өрсөлдөх улс төрийн намууд өнгөрөгч долоо хоногийн бямба гариг буюу 5 сарын 16-ны өдрийн 00:00 цагт багтаж сонгуульд намаа төлөөлөн оролцох нэр дэвшигчдээ зарласан.

Улс төрийн нам, эвслүүд хэн гэгч улс төрчийг аль тойрогт илгээх вэ? Басхүү хэн нь намаасаа мандат авч чадахгүй 2020 оны сонгуулийг өнжих вэ гэдэг үйл явц хэн бүхний анхаарлыг татаж байлаа.

Олон сарын өмнөөс яригдаж байсан таамгууд ч биелэлээ олж хэдийнэ зурагдсан “тавилан”-гаа дагах болов. Шинэ долоо хоногийн ажлын эхний өдрөөс “Намын бага хурлын үр дүнг харзная”, “Мандат авч чадах эсэхээ харж байж больё” гэж байсан хүлээгдэж байсан олон учраа уулзалтууд газар сайгүй товлогдож, ковидын онош батлагдсан тохиолдол 140 болон бүртгэгдсэн эсэхийг үл хамааран хөдөө хотгүй улс төр, хэвлэл мэдээллийн хүрээнд хөл хөдөлгөөн эрс нэмэгджээ.

Өнөөдөр МАН, АН-ын нэр дэвших эрхээ авсан гишүүд тусгай сургалттай байгаа бол “Зөв хүн электорат”  эвсэл нэгдсэн зураг авалт хийхээр товлосон зэргээс тодорхой харж болно.

Тэр бүү хэл намаасаа нэр дэвших эрхээ халааслав уу үгүй юу намын удирдлага нэрийг нь зарласнаас хойш ердөө л маргааш өглөөнөөс нь  өөрийгөө “хоногшуулах” далд сурталчилгааг зарим нэг шинэ кандидатууд  санаатайгаар байршуулж эхэллээ. Уг нь Сонгуулийн тухай хуулийн  39.1.-д “Сонгуулийн сурталчилгааг нэр дэвшигчид үнэмлэх олгосон өдрөөс эхлүүлж, санал авах өдрөөс 24 цагийн өмнө буюу санал авах өдрийн өмнөх өдрийн 00:00 цагаас өмнө зогсооно” гэж тодорхой заасан.

УИХ-ын сонгуульд нэр дэвшигчдийн үнэмлэхийг СЕХ-оос 6 сарын 2-ны өдөр олгох товтой. Гэтэл СЕХ нэр дэвшигчийн үнэмлэхийг албан ёсоор олгоогүй байхад Ардчилсан намыг төлөөлж УИХ-ын сонгуулийн 24-р тойрог нийслэлийн Сүхбаатар дүүрэгт өрсөлдөхөөр болсон Э.Долгион нь номын сурталчилгаа хэлбэрээр Сүхбаатар дүүргийн нутаг дэвсгэрт байрлах рекламны самбаруудад өөрийнхөө зургийг байрлуулжээ.   

Сонгуулийн тухай хуулийн   43.4.-д “Бизнесийн зорилгоор байнга ашиглагддаг сурталчилгааны самбар, дэлгэц, түүний орон зайг сонгуулийн сурталчилгаанд ашиглахгүй” гэж заасныг Э.Долгионы эл үйлдэл зөрчсөн гэж буруутгаж болохоор байна. 

Монгол Улсад хүчин төгөлдөр мөрдөгдөж байгаа Сонгуулийн тухай хуулиар бүх нэр дэвшигчдэд адил гараанаас өрсөлдөх боломжийг хуулиар зохицуулж өгсөн. Харамсалтай нь далд сурталчилгаа хэлбэрээр сурталчилгааны самбарт өөрийн овог нэр, хөрөг зургаа байршуулсан явдлыг СЕХ анхааралтай ажиглаж хяналт тавих үүргээ биелүүлэх шаардлагатай байна.  

 Энэ мэтчилэн сонгуулийн сурталчилгаа албан ёсоор эхлээгүй байхад далд хэлбэрээр өөрийгөө таниулж байгаа нэр дэвшигч албан ёсны сурталчилгааны хоногууд эхлэхээр ямар үйлдэл гаргахыг таашгүй. Ардчилсан нам энэ сонгуульд нэр цэвэр, боловсрол мэдлэгтэй залуусаа илгээж байгаагаа удаа дараа онцлон мэдэгдсэн ч тэдгээр мэдлэг боловсролтой залуус нь УИХ-д сонгогдоогүй байхдаа л хууль зөрчөөд эхэллээ.

Г.Сар

Сэтгэгдэл (3)
love
haha
wow
angry
sad
Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
2020 оны 05 сарын 18
202.9.46.106
zochin

baij l baig l dee goe l bnashd yamar hulgai hiij wanted bgaa bish

2020 оны 05 сарын 18
203.91.115.54
АН-д хууль гууль

нэр дэвшигчээс хасаачээ

2020 оны 05 сарын 18
150.129.141.36
Зочин

СЕХ ажлаа хийгээчээ