Монголын үндэсний допингийн эсрэг байгууллагын мэдэгдэлд дурдагдсан НОЦТОЙ БАРИМТУУД

Монголын үндэсний допингийн эсрэг байгууллага цаг үеийн асуудлаар мэдээлэл хийлээ. Үндэсний их баяр наадмын хүчит бөхийн барилдааны түрүү бөхөөс допинг илэрсэн ч хэргийн эзэн шинжилгээний явцтай холбоотой, зүй ёсны асуудал дэвшүүлсэн, спортын хүрээнд үнэлдэгддэг нөлөөлөгч С.Шижирбат Монгол Улс Парисын олимпод цагаан тугийн дор орох магадлал үүссэн талаар мэдээлсэн гээд олон асуудалд ганц тус байгууллагыг буруутгаад байсан юм. Тэгвэл МДЭҮБ-аас албан ёсны мэдэгдэл гаргаж, тус асуудлуудад тайлбар хийжээ. Мэдэгдэлд доор дурдсан дараах ноцтой баримтууд дурдагджээ.

Үүнд:

• МДЭҮА-ийг үйл ажиллагаа явуулах хугацаанд улсаас 2019 онд л цорын ганц удаа санхүүжилт өгч байжээ.
• Допингийн хяналтын хөтөлбөр хэрэгжүүлсэн тайланг хууль журмын дагуу өгөх ёстой байгууллага БТСУХ-нд цаг тухайд нь гаргаж өгөхөд “Авахгүй” гэдэг хариу өгч байсан байна.
• БТСУХ өөрсдөө тайлан хүлээж авахгүй гэсэн атлаа цаанаа олон улс руу WADA /ДДЭА/-т “МОНАДА нь төрийн байгууллагатай хамтран ажилладаггүй, мэдээ тайлангаа өгдөггүй” гэсэн ташаа мэдээлэл удаа, дараа илгээж байжээ.
• Токиогийн Олимп болон Бээжингийн өвлийн олимпод оролцсон тамирчдын 2021, 2022 онд хийгдсэн Допингийн хяналтын шинжилгээний төлбөрийг Монгол Улс хоёр жил гаруй төлөөгүй. Үүнээс болж ДДЭА-тай асуудал үүсэн, улмаар нэн ноцтой зөрчилд бүртгэж, хугацаа тогтоожээ. Бүр тодруулбал, Монгол Улсын тамирчид өөрийн орны тугийн дор жагсаж чадахгүй болохоос гадна Спортын олон улсын арга хэмжээний бүх эрхээ алдах эрсдэлтэй болсон байна.