Дараах 3 арслангаас хориотой бодис илэрч, Х.Ганхуягийн шинжилгээнээс хэвийн бус илэрц тогтоогджээ

Үндэсний бөхийн салбар хорооны үр дүнгийн удирлагын баг допингийн шинжилгээний дүнг Хууль зүй, дотоод хэргийн яамны пэйж хуудсаар дамжуулан мэдээллээ. 

Тэрхүү мэдээлэлд:  Аймгийн арслан Г.Хишигбат, М.Буяндэлгэр, цэргийн арслан Г.Жамбалдорж нараас допингийн төрлийн хориглосон бодис илэрсэн гэжээ. 

Процессын тухайд, Үндэсний их баяр наадмын үндэсний бөхийн барилдаанд дөрөв давж шөвгөрсөн 32 бөхөөс Үндэсний их баяр наадмын тухай хуулийн дагуу Монголын үндэсний допингийн эсрэг байгууллага 2024.07.12-ны өдөр шинжилгээ авч, 13-ны өдөр ХБНГУ-ын Дэлхийн допингийн эсрэг агентлагийн итгэмжлэгдсэн лаборатори болох Дрездены Спортын анализ болон спортын биохимийн институтэд хүргэн өгч, шинжлүүлсэн. 

Допингийн шинжилгээнд хамрагдсан 28 бөхийн шинжилгээний хариу хэвийн илэрцтэй 07.16-ны өдөр иржээ. Харин ГУРВАН бөхийн шинжилгээний хариу 07.18-ны өдөр, НЭГ бөхийн шинжилгээний хариуг 07. 22-ны өдөр цахим шуудангаар тус тус хүлээн авсан байна. 

Ийнхүү сүүлд ирсэн дөрвөн бөхийн гурваас нь буюу аймгийн арслан Г.Хишигбат, М.Буяндэлгэр, цэргийн арслан Г.Жамбалдорж нараас допингийн төрлийн хориглосон бодис илэрчээ. Харин Улсын харцага Г.Ганхуягаас хэвийн бус шинжилгээний илэрц тогтоогдсон хариу иржээ. 

Хэвийн бус гэх бодисын илэрцийн зөвшөөрөгдсөн хэмжээ нь жингийн ангилалтай спортын төрөл болон Дэлхийн допингийн эсрэг агентлагт бүртгэлтэй бөхийн спортын төрөлд зөвшөөрөгддөггүй байна. Харин жингийн ангилалгүй үндэсний бөхийн барилдааны төрөлд зөвшөөрөгдөх эсэх талаар үр дүнгийн удирдлагын багаас Дэлхийн допингийн эсрэг агентлаг, Дрездены Спортын анализ болон спортын биохимийн институтээс нэмэлт тодруулга хүссэн гэнэ. 

Э.БУЛГАН