Уул уурхайн нөхөн сэргээлтийн цогц сургалтыг зохион байгууллаа

Байгаль орчин, уур амьсгалын өөрчлөлтийн яам, “Байгаль орчны судалгаа, шинжилгээний төв” УТҮГ хамтран Уул уурхайн нөхөн сэргээлтийн цогц сургалтыг зохион байгууллаа.

Сургалтад улсын хэмжээнд үйл ажиллагаа явуулдаг төрийн болон орон нутгийн өмчит ААНБ, хувийн хэвшлийн төлөөлөл нийт 50 гаруй байгаль орчны асуудал хариуцсан мэргэжилтэн, албан хаагч танхим болон цахим хэлбэрээр хамрагдсан.

Уул уурхайн биологийн нөхөн сэргээлтийн тооллогыг Монгол Улсын хэмжээнд 2025 оны долдугаар сараас эхлэн “Байгаль орчны судалгаа, шинжилгээний төв” УТҮГ-аас зохион байгуулах юм. Энэхүү ажилтай холбогдуулан уул уурхайн биологийн болон техникийн нөхөн сэргээлтийг стандартын дагуу хийх, нөхөн сэргээлтийн хууль эрхзүйн орчныг сайжруулах, байгаль орчинд нөлөөлөх байдлын үнэлгээ, хог хаягдлын эрхзүйн орчин, аюултай хог хаягдлыг тээвэрлэх, хадгалах, цуглуулах болон уул уурхайн үйл ажиллагааны улмаас доройтсон экосистемийг нөхөн сэргээх талаар ойлголт мэдлэг олгох, ур чадварыг дээшлүүлэх зорилготой юм.

Төвийн захирал Л.Отгонцэцэг “Монгол Улсын уул уурхайн салбар эдийн засгийн голлох тулгуур хэвээр байгаа ч байгаль орчны нөөцийг хамгаалах, тогтвортой ашиглах, доройтсон экосистемийг нөхөн сэргээх шаардлага улам бүр чухал болж байна. Энэ утгаараа уул уурхайн биологийн болон техникийн нөхөн сэргээлтийг олон улсын жишиг, үндэсний стандартын дагуу гүйцэтгэх, мөн байгаль орчинд нөлөөлөх байдлын үнэлгээ, хог хаягдлын менежмент, аюултай хаягдлын тээвэрлэлт, хадгалалт, экосистемийн нөхөн сэргээлт зэрэг өргөн хүрээтэй ойлголт, арга зүйг энэхүү сургалтаар дамжуулан хамтдаа судлах юм” хэмээн онцолсон.

Доктор, профессор зэрэг өндөр зэрэглэлтэй мэргэжлийн багш нарын удирдлага дор явагдсан энэхүү мэргэшлийн сертификат олгох сургалт байгаль орчны нөхөн сэргээлтэд шаардлагатай 10 сэдвийг хамарлаа. Оролцогчид бүх сонирхсон асуултад бүрэн хариулт авч, сургалтыг өндөр үр дүнтэй боллоо хэмээн онцолсон юм.