Өчигдөр /2025.VIII.17/ болсон “TOUR OF MONGOLIA 2025” тэмцээний II гараа, Наранбулаг-Өндөрхангай чиглэлийн 125 км-ын уралдаанд түрүүлж, нийлбэр дүнг тэргүүлж эхэлсэн “Catco racing team” багийн тамирчин, ОУХМ Алтэнгэрэлийн Даваажаргалтай ярилцлаа.
-Өнөөдөр амжилттай уралдаж түрүүлсэнд баяр хүргэе. Өнөөдөр та гараанаас гараад л тасарсан. Тэргүүллээ алдалгүй байсаар түрүүлж чадлаа?
-Гараанаас гараад тасарсан, дундын барианы өмнө бас тасарсан. Хүчтэй ах нар хоорондоо отолцоод сиймхийгээрээ намайг явуулчихгүй юу. Тэгээд л явсаар байгаад ороод ирлээ.
-Өчигдөр толгойн группт явж байгаад бага зэрэг хоцорч орж ирсэн алдаагаа заслаа?
-Өчигдөр барианаас хоёр километрийн өмнө тасрах гэж оролдоод бариулсан.
-Өнөөдөр биеийн байдал сайн байх шиг байна. Бэлтгэл сургуулиа хэрхэн тохируулсан бэ?
ОУХМ А.Даваажаргал “TOUR OF MONGOLIA 2025” тэмцээний II гараанд түрүүлж орж ирж буй агшин
-Тэмцээн эхлэхээс өмнө олон хоног автобусаар яваад, бэлтгэл сургуулилт жаахан цалгардсан. Өнөөдөр биеийн байдал өчигдрийнхөөс хамаагүй дээр, амьсгал онгойсон байна.
-Өмнө нь олон өдрийн уралдаанд хэр олон орж байв. Ямар амжилт гаргасан бэ?
-Олон өдрийн уралдаануудад оролцож байсан. Нийлбэр дүнгээрээ тэргүүлж байгаагүй ээ. Анх удаа л тэргүүлж үзэж байна. Маш их баяртай байна. Этапт бол түрүүлж байсан. Өсвөр ангилалд бол 2022 онд Ховдод болсон “Tour of Mongolia” олон өдрийн уралдааны өсвөрийн ангилалд нийлбэр дүнгээр түрүүлж байсан.
-Энэ тэмцээнд багийн болоод хувь тамирчны хувьд ямар зорилго тавьж оролцож байгаа вэ?
Багаараа түрүүлэх зорилго тавьсан. Хувь тамирчны хувьд шар цамцаа хадгалах. Багийн ажиллагаанаас л их зүйл хамаарна. Загастайн давааны өгсүүрт их юм шийдэгдэх байх...
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна