Нийслэл хотод хамгийн дутагдалтай байгаа зүйл бол автомашины зогсоол. Ялангуяа хорон сууцны хороолол дунд зогсоол хүрэлцдэггүй тул боломж, бололцоотой газартаа байрлуулцгаадаг. Нийслэл хотод 700 гаруй мянган автомашин байдаг. Эдгээр автомашинууд бүгд ямар нэгэн газар хонож байгаа. Гэтэл зарим иргэн шөнө дөлөөр, байрныхаа гадаа учраа олоод хонож байгаа тээврийн хэрэгслийн зургийг авч, Тээврийн цагдаа руу илгээх болжээ. Тээврийн цагдаагийн алба үүр шөнийн заагаар авсан уг зургийг нь үндэслээд “Жолоочийн үүргээ биелүүлээгүй” гэж үзэж, иргэд рүү торгуулийн хуудас илгээх болсон байна.
Хориотой газар зогссон тээврийн хэрэгслийн зургийг авч, хуулийн байгууллагад илгээн торгууль, шийтгэврийн мөнгөнөөс нь хувь хүртдэг албан бус ажлын байр бий болсон. Нэг талаас Нийслэлийн иргэн хэн ч хууль, журамд захирагдах ёстой тул зөрчил гаргасан бол хариуцлагаа хүлээх нь зүйн хэрэг. Гэхдээ нөгөө талаас, үүргээ биелүүлэх боломж бололцоо хэр билээ гэдгийг бодолцож үзмээр санагдана.
Өнөөдөр Нийслэл хотод хангалттай хэмжээний авто зогсоолтой орон сууцны хороолол бараг байхгүй шахам. Барилгын компаниуд газраа стандарт хэмжээгээр авдаг ч далд зарлага /авлига/ ихтэй тул түүнийгээ шингээж, давхар нэмэх, барилгынхаа талбайг томруулах зргээр зогсоол хийх талбайгаа багасгадагтай холбоотой гэж учир мэдэх хүмүүс ярьдаг.
Үндсэндээ, нийслэлчүүд, тэр дундаа орон сууцанд амьдагдаг иргэд анхнаасаа л автомашинаа зориулалтын зогсоолд байршуулах үүргээ биелүүлэх боломжгүй байдалтай нүүр тулдаг. Гэтэл энэ аргагүй байдал дээр дөрөөлж өдөр бүр торгох нь гарах гарцгүй болгож байгаа хэрэг хэмээн иргэд бухимдаж байна.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна