Л.Оюун-Эрдэнийн “Сөрсөн базаа” амжилттай болов уу

Зарим нэг эрх мэдэлтний зөгнөснөөр эхнээсээ л халуухан өрнөх учиртай байсан “Хаврын чуулган” санаснаас аядуу зөөлөн эхэллээ.

УИХ-ын даргын дэргэдэх зөвлөл Чуулганы хуралдахын өмнөх долоо хоногт хэлэлцэх асуудлын жагсаалтыг урьдчилж гаргадаг. Гэтэл энэ удаад хуваарь гаргасангүй.

Өмнө нь хэвлэлээр ярьж, бичиж байсан “Чуулганы эхэнд Ерөнхийлөгч орж ирж гишүүдийг “гөлөлзүүлж” байгаад хуулиа дэмжүүлэх” үйл явц болсонгүй. Ерөнхийлөгч үг хэлсэн ч төвийг сахисан үг бэлджээ. Хамгийн чухал нь “УИХ-ын гишүүнийг эгүүлэн татах эрх ард түмэнд байдаг” гэж хэлсэн нь анхаарал татав. Уг нь түүний санаачилсан хуулийн төсөлд УИХ-ын гишүүнийг эгүүлэн татах шийдвэрийг ҮХЦэц гаргахаар тусгасан юм.

УИХ-ын гишүүнийг эгүүлэн татах нь зөв ч хэн татах вэ гэдэгт гол асуудал байсан тул Ерөнхийлөгчийн энэ үг тод сонсогдлоо.  Тодруулбал, Ерөнхийлөгч ҮХЦ-д эрх мэдэл өгөх хувилбар дэмжигдэхгүй нь гэсэн хана авсан мэт санагдлаа.     

Хоёрдугаарт, Хаврын чуулганаар авлигачдыг зарлаж, гишүүнээс эгүүлэн татах чинээ ярьж байсан Хуульзүйн сайд Б.Энхбаяр Хаврыг халуухан болно гэж хэлснийгээ ирж яваа цагтай холбож, “Сая Завханаар яваад ирлээ. Халуухан, дулаахан хавар болж байна” гэсэн нь өмнөхөөсөө нэлээд халирсан, Завханд ярьж байснаасаа ч халирсан сонсогдов.

Энэ бүхэн нь Л.Оюун-Эрдэнийн хэвлэлд өгсөн ярилцлага, түүндээ хөндсөн УИХ-ын гишүүнийг эгүүлж татах эрх мэдлийг есөн гишүүнтэй ҮХЦ-д өгөх юм бол тэмцэл өрнүүлнэ гэсэн "сөрсөн базаа" нь байгаа оножээ гэсэн сэтгэгдлийг төрүүлж байна.

 Өөрөөр хэлбэл, тэрбээр парламентын ардчиллаа хамгаалах, авч үлдэхийн тулд улс төрийн намууд, УИХ-ын гишүүд дуугарахыг уриалсан бөгөөд Чуулганы эхний өдөр Үндэсний эвслийн Н.Номтойбаяр, УИХ дахь АН-ын бүлэг Ерөнхийлөгчийн санаачилсан хуулийн төслийг дэмжихгүй гэдгээ илэрхийлсэн юм.