Дональд Трамп АНУ-ын шинээр сонгогдсон Ерөнхийлөгчийн хувиар анхны хэвлэлийн бага хурлаа хийлээ. Хэвлэлийн хурлын үеэр тэрбээр урьдын адил этгээд, хурц шийдэмгий, цог золбоотой байсан бөгөөд CNN сувгийг худал хуурмагийг дамжуулдаг “аймшигт байгууллага”, Obamacare эмнэлгийн даатгалын системийг гамшиг хэмээн нэрлэжээ.
Трамп бизнесээ хөвгүүддээ шилжүүлж байгаагаа онцлон тэмдэглээд, Мексикээр мөнгө гаргуулж, хоёр улсын хил дээр хана барих төлөвлөгөөгөө баталсан байна. Түүнчлэн ОХУ-ын Ерөнхийлөгч Владимир Путиныг шударга хүн гэж үздэг хэмээгээд, Орост ямар нэгэн данс, бизнес, хөрөнгө байдаг тухай мэдээллийг үгүйсгэлээ. Ингэхдээ Вашингтон Москватай харилцаагаа сайжруулах шаардлагатай гэж тэмдэглэсэн байна.
Дональд Трамп хэвлэлийнхнийг худал хуурмаг мэдээлэл тараадаг гэж зэмлэжээ. “Манайхан Оростой аймшигтай харилцаатай. Харин бидэнд өнөөгийн АНУ-ын засаг захиргааны үүсгэсэн Исламын улстай тэмцэхэд тэдний тусламж хэрэгтэй” гэж Трамп хэлжээ.
...Трамп “Би Путинтэй эвлэрч чадах эсэхээ мэдэхгүй байна. Гэхдээ үүнд найдлага тавьж байгаа” хэмээн мэдэгдсэн байна...
Гэхдээ тэрбээр шаардлагатай бол Оростой хатуу харилцаатай байхад бэлэн гэдгээ илэрхийлээд Ерөнхийлөгчийн сонгуульд гол өрсөлдөгч Хиллари Клинтоны нэрийг ч энэ асуудал дээр орхигдуулсангүй. Тэрбээр “Би Путинд Клинтоноос ч хатуу хандах болно” гэжээ. Трамп мөн бусад орон АНУ-ыг илүү хүндэтгэдэг болно гэж амласан байна.
Их улс төр дэх кибер халдлага
Кремль Ардчилсан намын серверийг эвдсэн хэрэгт холбоотой юу гэсэн асуудал АНУ-ын сүүлийн үеийн чухал сэдэв болоод байгаа. Тиймээс ч Трамп энэ сэдвийг онцгойлон авч үзэхээс өөр аргагүй болжээ.
“Манай системийг Орос, Хятад гээд хэн дуртай нь эвдэж чадна” хэмээн Трамп АНУ-ын кибер аюулгүй байдлын түвшнийг хангалтгүй байгааг тэмдэглэсэн байна. Гэхдээ тэрбээр тагнуулынханд Оросын удирдлагууд серверт халдсан гэсэн баримт байгаа гэдэгт эргэлзэж буйгаа илэрхийлжээ. Трампын хэлснээр түүнд 90 хоногийн хугацаанд кибер халдлага болон түүнийг эсэргүүцэх боломжийн тухай тайланг танилцуулах гэнэ.
Дашрамд дурдахад Америкийн тусгай албаныхан АНУ-ын Ерөнхийлөгчийн сонгуулийн үеэр Оросын хакерууд кибер халдлага хийсэн гэж буруутгаж байгаа бөгөөд үүнтэй холбоотойгоор Обама Оросын эсрэг ээлжит хориг арга хэмжээгээ авсан билээ.
Мексикийн агуу их хана
Сэтгүүлчид түүнчлэн Трампаас Мексиктэй хиллэдэг хэсгээр “хашаа” босгох тухай төлөвлөгөөг нь сонирхсон байна. Энэхүү агуу том төсөл нь түүний сонгуулийн мөрийн хөтөлбөрийн нэг зүйл заалт байсан юм.
Трамп “Хашаа биш, хана” хэмээн залруулаад үүнийг Мексикийн мөнгөөр босгоно гэжээ. Тэрбээр Мексикээс хана барихад 5-10 тэрбум ам.доллар шаардана гэж өмнө нь мэдэгдэж байсан. Энэхүү ханыг АНУ-д хар тамхины худалдаатай тэмцэх, хяналтгүй цагаачид орж ирэхээс сэргийлэхийн тулд босгох төлөвлөгөөтэй байгаа гэнэ.
Obamacare-ийг булшлах нь
Трамп сонгуулийн аяны үеэр Барак Обамагийн Ерөнхийлөгчөөр ажиллаж байх хугацаандаа хийсэн гол амжилтуудын нэг болох Obamacare эрүүл мэндийн даатгалын системийг нэг бус удаа шүүмжилж байсан юм. Сэтгүүлчид ч түүний хэлсэн ярьсныг мартаагүй болохоор Obamacare-ийн цаашдын хувь заяаг сонирхжээ.
Трамп Обамагийн хийсэн гол ажлуудын нэг болох энэ системийг илэрхийлэхдээ огтхон ч ичиж зовсонгүй. Харин ч “Энэ бол жинхэнэ гамшиг” хэмээн хэлсэн байна. Тэрбээр тангараг өргөснөөсөө хойш долоо хоногийн дотор эрүүл мэндийн тухай шинэ хууль гаргахаар төлөвлөж байгаа гэнэ.
Obamacare хэмээх албан бус нэршил авсан эрүүл мэндийн шинэчлэлийг АНУ-д Трампаас гадна олон хүн эсэргүүцдэг. Учир нь даатгалын энэхүү систем нь дундаж давхаргынханд хэд дахин өндөр өртөгтэй байдаг аж.
CNN хэмээх аймшигт байгууллага ба худалч BuzzFeed
АНУ-ын шинээр сонгогдсон Ерөнхийлөгч Дональд Трампын эхний хэвлэлийн бага хурал дуулиан шуугиангүйгээр өндөрлөсөнгүй. Трамп CNN-ийн сэтгүүлчид асуулт тавих боломж олголгүй, “зөвхөн шударга сэтгүүлчидтэй л харьцана” гэжээ.
...Трамп сэтгүүлч рүү хандаж, “Та биш ч танай байгууллага аймшигтай, худал хуурмагийг нийтэлдэг” хэмээн эрс шүүмжилжээ...
Шинээр сонгогдсон Ерөнхийлөгч түүнчлэн Америкийн хэвлэлүүдийг өөрийнх нь тухай үнэн бодит мэдээлэл нийтэлдэггүй гэж “Твиттер”-тээ дурдсан байна. Мөн BuzzFeed сайтын ажилтнуудыг “маш худалч хүмүүс” гэж нэрлэжээ.
Хувийн ашиг сонирхол ба бизнес
Тэрбумтан эр, бизнесмэн Трамп болон улстөрч Трамп хоёрын хооронд ашиг сонирхлын зөрчил үүсэх юм биш биз гэсэн асуултад ийнхүү хариулсан байна. Трамп “Нэгдүгээр сарын 20-нд тангараг өргөх ёслолоос өмнө бүх хувьцаагаа трастын байгууллагад шилжүүлнэ. Харин бизнесээ бага Дональд болон Эрик нарын хөвгүүдийнхээ удирдлагад шилжүүлэхээр болсон” гэжээ.
Трамп заалнаас гарах үеэрээ ширээн дээр байгаа багц цаасыг зааж, “Энэ бол бизнесээ хөвгүүддээ шилжүүлэх баримтуудын зөвхөн нэг хэсэг нь” гэж тайлбарласан байна. Мөн тэрбээр “Дөрөв, эсвэл найман жилийн дараа би тэдэн дээр очоод “Та нар сайн ажиллалаа” хэмээн хэлнэ гэж найдаж байна. Эсвэл би тэдэнд “Та нар халагдсан” гэж ч хэлж мэдэх юм” хэмээн мэдэгджээ.
Эх сурвалж: Өглөөний сонин
Сэтгэгдэл бичигдээгүй байна