“Рио Тинто” Ц.Туваан сайдад захидал бичиж, татварын маргаанаа цэглэх санал тавьжээ

“Рио Тинто” группын Зэсийн бүлгийн захирал Кэти Жексон Аж үйлдвэр, эрдэс баялгийн сайд Ц.Туваанд захидал бичиж, олон жил үргэлжилсэн татварын маргаанд цэг тавих санал тавьжээ.
Тодруулбал, татварын актыг 295 сая ам.доллар гэж үзээд асуудлаа шийдье гэсэн байна. Afr.com энэ талаар мэдээллээ. 

Татварын алба Оюутолгой компанид 2018, 2019 онд хоёр удаа нэг их наяд гаруй төгрөгийн татварын акт тавьсан бөгөөд энэ акттай холбоотой маргаан өнөөдрийг хүртэл шийдэгдээгүй явсаар өнөөдрийг хүрсэн юм. Энэ хооронд Рио Тинто хоёр удаа зөвшилцөх санал тавьсан ч Засгийн газар “Зөвшилцвөл хууль зөрчинө” гэсэн байр суурь илэрхийлэн өнөөдрийг хүртэл зөвшөөрөөгүй явж ирсэн байдаг. Гэхдээ, Рио Тинтогоос маргаан шийдэгдтэл түр байршуулсан 1.1 их наяд төгрөгийг иргэдэд 300,000 төгрөгөөр тарааж өгсөн. 

Саналыг хүлээж авбал "Рио Тинто" дээрх мөнгийг нэхэмжлэхгүй аж.  

Afr.com-д бичсэнээр, Рио Тинто Монголын Засгийн газартай учраа олохыг яаравчилж байгаагийн учир нь “Гленкор”-той явуулж байгаа хэлцэл байж магадгүй аж. Уул уурхайн ертөнцөд ““Рио Тинто”, “Гленкор” нэгдэж, дэлхийн уул уурхайн хамгийн том уул уурхайн компанийг үүсгэн технологийн үйлдвэрлэлд чухал үүрэгтэй өнгөт металлыг хянаж, ноёрхлоо тогтооно” гэсэн мэдээлэл гараад байгаа бөгөөд үүнээс өмнө асуудлуудаа шийдэх ёстой болсонтой холбоотой гэж бичигч таамагласан байв. 

Учир нь, зэсийн үйлдвэрлэлд байр сууриа ахиулах энэ төлөвлөгөөнд Оюутолгой шийдвэрлэх үүрэгтэй аж. Тэд зэсийн үйлдвэрлэлээ 2030 он гэхэд нэг сая тоннд хүргэх зорилгынх нь тал нь Оюутолгойд ногдох юм байна.

Түүнчлэн, гүний уурхайн ашиглалтад орох хугацаа хойшилсныг нуун дарагдуулсан гэх хэрэгтэй холбоотой Пентвотерын хувьцаа эзэмшигчидтэй хийх шүүх хурал нь ирэх хоёрдугаар сарын 5-нд товлогдсон нь ч нөлөөлсөн байх магадлалтай гэнэ.