“Андын илч” уурхайгаас сүүлийн хоёр сард 20 мянга гаруй тонн нүүрс хилээр гарчээ

Сүхбаатар аймгийн Эрдэнэцагаан сумын нутагт орших “Андын илч” компанийн нүүрсний орд хятадууд болон орон нутгийн дарга нарын “халаас”-нд орж, өдгөө ямар нөхцөл байдалтай байгаа талаар цуврал мэдээллийг бид бэлтгэн хүргэсэн. 

Өдгөө зэвсэгт халдлага үйлдсэн этгээдүүд, захиалагч Э.Лутбаяр, Жан Чуан нарын хүмүүс, орон нутгийн удирдлагууд гээд холбогдогч талуудыг цагдаагийн байгууллагаас шалгаж буй.

Тэгвэл хэрэг шалгагдаж буй хугацаанд гаалийн талбайгаас нүүрс урагшаа гарч байгаа талаар бидэнд мэдээлэл ирсэн юм.

Үүнийг нягталж үзэхэд “2023 оны хоёрдугаар сарын 20-ноос хойш буюу сүүлийн хоёр сар гаруйн хугацаанд 5051118 регистрийн дугаартай “Андын илч” компани 20 орчим мянган тонн нүүрс буюу 1.5 тэрбум төгрөгийн нүүрсийг хилээр гаргасан” тухай мэдээлэгджээ. 

Энэ нь урд хөршид зарагдах үнэ нь барагцаагаар дөрвөн тэрбум орчим болох аж.

Уг нь уурхайд зэвсэгт халдлага болж, уурхайн удирдлага солигдох үед хэргийг шалгаж дуустал компанийн шинэ, хуучин хоёр гэрчилгээг хурааж, үйл ажиллагааг нь зогсоох тухай хүсэлт хуулийн байгууллагад ирсэн талаар эх сурвалжууд мэдээлж байв.

Одоогоор тус хүсэлт хангагдсан эсэх, гарсан нүүрсний төлбөр шилжсэн эсэх тодорхойгүй байна.

Харин өмнө нь хятадууд 49 хувь эзэмшигч Монголын тал буюу Сүхбаатар аймгийн ИТХ-тай ямар нэгэн байдлаар тохиролцож, нүүрсний экспорт, борлуулалтын орлогыг компанийн дансаар оруулдаггүй.

Цаашлаад төрийн өмчийн 34 хувиас дээш оролцоотой компани Шилэн данс хөтлөх хуулийн заалтыг биелүүлдэггүй, хамгийн гол нь аймаг орон нутагт нэг ч төгрөгийн ногдол ашиг өгдөггүй байсан нь тодорхой болсон.

Өөрөөр хэлбэл, Сүхбаатарчуудын өмч болсон нүүрсний баялаг орд орон нутгийн иргэдэд ямар ч ашиггүй ажиллаж, эсрэгээрээ орон нутгийн дарга нар хөрөнгөжсөөр ирсэн. Энэ удаад ямар жишгээр явж буй нь ихээхэн анхаарал татаж байгаа юм.