"JCI Mongolia" байгууллагын бэлэглэсэн тоног төхөөрөмжөөр 2200 гаруй нярайн амь насыг аварчээ

“JCI Mongolia” байгууллагын нярайн эндэгдлийг бууруулах зорилготой “Save Angels” төсөл нь анх 2015 онд хэрэгжиж эхэлсэн билээ.

“Save Angels” төслийг 2015 оноос хойш жил бүр тогтмол хэрэгжүүлж байгаа бөгөөд өнгөрсөн 9 жилийн хугацаанд Эх Хүүхдийн Эрүүл Мэндийн Үндэсний Төвөөс эхлээд аймаг сумуудын долоо гаруй эмнэлгийн байгууллагад 1.5 тэрбум төгрөгийн үнэ бүхий тоног төхөөрөмжийг тусламжаар хандивлаж, эх дэлхийдээ ирэх гэж яаран дутуу төрсөн нийт 2200+ орчим нярайн амь насыг авралцсан юм.       

Төслийн гол зорилго Монгол орон даяар аймаг бүрд шаардлагатай тоног төхөөрөмжийг бэлэглэж нярайн эндэгдлийг бууруулахыг зорьж байгаа бөгөөд энэ жилийн хувьд зүүн аймгуудаас анхдагч болж Сүхбаатар аймгийн нэгдсэн эмнэлэгт 18 төрлийн 22 ширхэг нийт 66,7 сая төгрөгийн үнэ бүхий нэн шаардлагатай тоног төхөөрөмжийг А.Батгэрэл ерөнхийлөгчтэй JCI Chairman салбар байгууллагын гишүүд, хамт олноороо төлөөлөн гардуулж өглөө.

Ийн явж байх хугацаанд нэгэн сонирхолтой үйл явдал болсон нь. Цуваан дахь нэг машины өндгөн тулгуур мултран яахаа мэдэхгүй зогсож байхад нь Сүхбаатар аймгийн иргэн (нэрийг нь мэдэж чадалгүй өнгөрсөн) ачилтын машинаа гарган тэдэнд тусалсан үйл явдал болов. Маш хүнд ачаатай байсан тэргийг 2 цаг хэрээтэй ноцолдон хашаанд оруулж өгснийх нь дараа төлбөр өгөх гээд дансыг нь асуухад “Буян хийж яваа хүмүүст буян болох гэсэн юмаа” хэмээсэн нь уг аялалд явсан залуучуудын сэтгэлийг ихээр хөдөлгөснийг давхар ярьцгааж байв.

Сүхбаатар аймгийн эмнэлгийн эмч сувилагч нар ч тэднийг баяр хөөртэйгөөр угтан, энэхүү төхөөрөмжүүд нь хэчнээн хүүхдийн амь аврахыг хэлж өгч байлаа. 

JCI Chairman салбарын баг хамт олон нь эрүүл мэндийн байгууллагын судалгаан дээр үндэслэн энэ ондоо багтаан дахин нэг аймгийг шаардлагатай тоног төхөөрөмжөөр хангахаар зорьж байна.

МОНГОЛЫН ҮРС МАШ ОЛОН БОЛОХ БОЛТУГАЙ!

ЭРҮҮЛ МОНГОЛ ХҮҮХДИЙН ТӨЛӨӨ!

SHARE YOUR VALUES!