П.Батцэцэг: Могой хоромхон зуурт хүүгийн минь улнаас хазчихаад байшингийн суурийн нүх рүү орчихсон

Нийслэлд бамбай хоншоорт могой үзэгдэх болсон гэсэн түгшүүртэй мэдээлэл цахим орчинд тавигдаж, холбогдох байгууллага анхаарал болгоомжтой байхыг сануулж байгаа билээ. Тэгвэл бамбай хоншоорт хортой могой гэлтгүй хоргүй могой ч бага насны хүүхдийн эрүүл мэндэд ноцтой аюул учруулах аюултай байдаг аж. Өнгөрсөн зургадугаар сард дөрвөн настай хүүхдээ могойд хазуулж, эмчилгээ сувилгаа хийж буй ээж бусдад сэрэмжлүүлэх үүднээс бидэнд хандсан юм.

-Хүүхэд тань могойд хазуулж гэмтсэн юм байна. Энэ явдал хэзээ, хаана болсон бэ?   

-Сарын өмнө хотын ойролцоо Нүхтийн ам лагерьд очиж амрах үеэр энэ явдал болсон. Хүүхэд маань могойд хатгуулсан золгүй явдал гарсан. Аз болоход хүү минь хортой могойтой тааралгүй өнгөрсөн юм.

-Хүү тань хэдэн настай вэ?

 -Одоо хүү минь 4 настай

-Нүхтийн амралт гэхээр, хоттой ойр юм байна. Орчин тойрон нь ямархуу газар байсан бэ?

-Бидний бууж амарсан газар уулархаг хад асгатай газар байсан.Тиймэрхүү орчинтой газраар явахдаа сэрэмжтэй байх хэрэгтэй санагдсан.

-Болсон явдлын талаар дэлгэрэрүүлж ярихгүй юу?

-Хүү минь өмнө нь могойг үзэж харж байгаагүй болохоор шинэ содон санагдсан байх. Могой хоромхон зуур л хүүгийн хөлийн улыг нь хазаад байшингийн суурь хэсэгт байсан нүх рүү орсон. Би маш их сандарч балмагдан түргэн тусламж дуудаж, Яармагийн нэгдсэн эмнэлэгт хүргэгдсэн.

Яармагийн нэгдсэн эмнэлэг үнэхээр сайн үйлчилгээ үзүүлж эмчилгээ дууссаны дараа ч утсаар холбогдон биеийн байдлыг нь асууж санаа тавьсанд нь талархаж байна.

-Хүмүүст хандаж юу гэж зөвлөх вэ?

-Том хүмүүс хүүхдийг бодвол могойг хараад мэднэ. Хүүхдүүд харин анх удаа л харж байгаа тохиолдолд гэм хорыг нь мэдэхгүй эндэх ч аюултай юм байна. Бага насны хүүхдийг хаана ч хараа салгалгүй сайтар харж ажиглаж байх хэрэгтэй.