"Оюутолгойгоос ч том" гэгдэж асан Хармагтай ордын зэс, алтны нөөц дахин нэмэгдэх нь

Нэгэн үе "Оюутолгойгоос ч том" гэж яригдаж байсан Хармагтайн ордын зэс, алтны нөөц дахин нэмэгдэх боломж бүрджээ. 

“Занаду майнз” компани нэмэлт өрөмдлөг хийсний үр дүнд ирээдүйтэй байж болох эрдэсжсэн шинэ даврхаргуудыг олж илрүүлсэн байна. Whit ордод хийсэн 14 өрөмдлөгөөр зэс, алтны өндөр агууламжтай хүдэржилтийн давхарга илэрсэн талаар компани мэдээллээ.

Хамгийн өндөр үр дүн үзүүлсэн нь KHDDH638 өрөмдлөгийн цооног байсан бөгөөд 172 метрээс 0.34% (0.28% зэс ба 0.11 г/т алттай) 654 метр, 512 метрээс 0.61% (0.48% зэс 0.25 г/т алт) агуулгатай 32 метр, 617 м-ээс 0.71% (0.59% зэс ба 0.23 г/т алт) агуулгатай 58 метр, 651 метрээс 1.45% (1.17% зэс 0.50г/т алт) агуулга бүхий найман метр зузаан хүдэржсэн давхарга тус, тус илэрсэн байна. Ингэснээр 2021 онд Эрдэс баялгийн зөвлөлөөр батлуулж байсан нөөцийг /3 сая тонн зэс, 8 сая унци алт/ нэмэгдүүлэх боломжтой болжээ. Ялангуяа шинэ өрөмдлөгөөр анх удаа 1 хувиас дээш агуулгатай хүдэржилтийн давхарга илэрсэнд компани онцгой баяртай байгаа аж. Тус компани анх 2017 онд нөөц батлуулж байснаас хойш ийнхүү нэмэгдүүлсээр байна. 

Компанийн гүйцэтгэх захирал Колин Мурхедын хэлснээр, сая хийсэн өрөмдлөгүүд нь Whit талбайд илэрсэн нөөц л маш өндөр агууламтай нөөцийн дээд хэсэг байж магадгүй бөгөөд дахин нарийн судалгаа хийж, нөөцийг нэмэгдүүлэх боломжтой гэж үзэж байгаа юм байна.