ХОМ: Засгийн газрын гишүүдийн "БЭЛ БЭНЧИН"-тэй ТАНИЛЦ

Шадар сайд С. Амарсайхан нь 10 тэрбум 767 сая төгрөгийн үнэ бүхий нийтийн 3 орон сууцтай 

Тэрбээр 2020 оны байдлаар 1 тэрбум 817 мянган төгрөгийн орлоготой байсан бол 2021 оны байдлаар 46 сая төгрөг болтлоо буурчээ. Түүний хувьд 202 сая 638 мянган төгрөгийн үнэ бүхий 2 автомашин, 225 сая төгрөгийн үнэт эдлэл, 2 тэрбум төгрөгийн авлагатай, 100 сая төгрөгийн зээлтэй аж. Хадгаламжийн тухайд 2020 оны байдлаар 77 сая төгрөгтэй байсан бол 2021 онд 96 сая төгрөг болж нэмэгджээ.  

ЗГХЭГ-ын дарга Ц.Нямдоржийн орлого өмнөх жилээсээ 7 сая төгрөгөөр нэмэгджээ

Тухайлбал 2021 оны байдлаар нийт орлого нь 42 сая төгрөг болсон аж. Тэрбээр 135 мянган төгрөгийн хадгаламжтай, 383 сая төгрөгийн 2 орон сууц, 1ш зуслангийн байшин, Toyota, Venza загварын 29 сая төгрөгийн үнэ бүхий авто машин, 2ш авто зогсоолтой, 7 сая төгрөгийн үнэт эдлэлтэй аж.  
Сангийн сайд Б.Жавхлан 2020 онд 1 тэрбум 20 сая төгрөгийн үнэлгээ бүхий орон сууцтай байсан бол 2021 онд байргүй болжээ

Сангийн сайд Б.Жавхлан нь 2021 оны мэдүүлэгтээ ямар нэг орон сууц, автозогсоолын талаар мэдүүлээгүй аж. Түүний орлого 2020 онд 36 сая төгрөг байсан бол 2021 онд 430 сая төгрөг болж, 257 сая төгрөгийн үнэ бүхий малтай байсан бол 445 сая төгрөг болтлоо өсчээ. Тэрбээр 80 сая төгрөгийн автомашинаа 195 сая төгрөгийн үнэтэй болгож өөрчлөн, 404 сая төгрөгийн авлагатай, 123 сая төгрөгийн зээлтэй гэж мэдүүлжээ.

Хууль зүй, дотоод хэргийн сайд Х.Нямбаатар нь 1 тэрбум 122 сая төгрөгийн орон сууцтай. Түүний 2021 оны орлогын мэдүүлэг нь 2020 оноос төдийлөн өөрчлөгдөөгүй байна

Тухайлбал 182 сая төгрөгийн үнэлгээ бүхий Toyota, Land Cruiser 200 маркийн автомашин, 194 сая төгрөгөөр үнэлэгдэх малтай, 100 сая төгрөгийн үнэлгээ бүхий 480 метр квадрат эзэмшлийн газартай аж. Нийт орлогын хэмжээ 26 сая төгрөг, гэр бүлийн гишүүдийн орлого 98 сая төгрөг байсан бол 24 сая төгрөг болж буурчээ.

Боловсрол,шинжлэх ухааны сайд Л.Энх-Амгалангийн жилийн орлого 8 тэрбум 744 сая төгрөг

Тухайлбал гэр бүлийн гишүүдийн орлого нь 2020 онд 281 сая 100 мянган төгрөг байснаас 2021 онд 598 сая 400 мянган төгрөг болж өсчээ. Тэрбээр 4 тэрбум 462 сая 333 мянган төгрөгийн нэг амины орон сууц, хоёр нийтийн орон сууц, нэг үйлчилгээний зориулалттай барилгатай. 4 тэрбум 905 сая 373 мянган төгрөгийн авлага, 244 сая төгрөгийн зээлтэй. Мөн 300 сая төгрөгийн үнэлгээ бүхий Lexus 570 машин, 67 сая төгрөгийн хадгаламжтай байсан бол 14 сая төгрөг болж буурчээ.

Зам тээврийн хөгжлийн сайд Л.Халтар нь "Аргалант Атар" ХХК-ийн 100 хувийн хувьцаа эзэмшигч

Түүний хөрөнгө орлогын мэдүүлгийг харвал 2021 онд 64 сая төгрөгийн орлоготой, 719 сая төгрөгийн 2 орон сууц, нэг амины орон сууц, нэг хашаа байшин, нэг зогсоолтой гэж мэдүүлжээ. Харин 2020 онд гэр бүлийн гишүүдийг орлогогүй гэж мэдүүлсэн бол 2021 онд 176 сая төгрөг болж нэмэгдсэн аж. Тэрбээр 22 сая төгрөгийн үнэлгээ бүхий газар, 78 сая төгрөгийн үнэт эдлэлтэй, 315 сая төгрөгийн авлагатай.

Байгаль орчин, аялал жуулчлалын сайд Б.Бат-Эрдэний 2020 оны орлого нь 12 сая байсан бол 2021 онд 110 сая болж өсжээ

Харин гэр бүлийн гишүүдийн нийт орлого нь 22 сая 800 мянган төгрөг аж. Тэрбээр 450 сая төгрөгийн үнэлгээ бүхий нэг орон сууцтай. 50 сая төгрөгийн Chrysler, Dodjedurango маркийн автомашин, 100 сая төгрөгийн үнэлгээ бүхий 400 метр квадрат газар, 12 сая төгрөгийн хадгаламжтай бол 95 сая төгрөгийн зээлтэй байна. Б.Бат-Эрдэнэ сайд нь Монгол Тулгат Финанс ХХК, Монмарт трэйд ХХК-ийн 150000 болон, 100 ширхэг хувьцааг тус тус эзэмшдэг.
Гэр бүлийнх нь гишүүдийн орлого 3 тэрбум давсан Соёлын сайд Ч.Номин

Түүний нийт орлого 235 сая төгрөг ба 11 тэрбум 458 сая төгрөгийн үнэлгээ бүхий найман нийтийн орон сууц, гурван авто зогсоол, хоёр өвөлжөө, хаваржаатай аж. Тэрбээр 1 тэрбум 112 сая төгрөгийн үнэ бүхий  Toyota, Land Cruiser 80- 1, Alphart- 1, Porsche, Cayenne- 1, Mercedes Benz, G 55 AMG- 1,Nissan, Patrol- 1 зэрэг авто машинуудтай. Хадгаламжийн тухайд дотоодын банканд 4 тэрбум 196 сая төгрөг, гадаадын банканд 1 тэрбум 124 сая төгрөгийн хадгаламжтай. 22 тэрбум 300 сая төгрөгийн авлага, 9 тэрбум 300 сая төгрөгийн зээлтэй байна, 750 сая төгрөгийн үнэт эдлэлтэй хэмээн мэдүүлжээ.

Гадаад харилцааны сайд Б.Батцэцэг нь 2020 онд нийт орлогын хэмжээгээ 220 сая төгрөг хэмээн мэдүүлсэн бол 2021 онд 421 сая төгрөг болж нэмэгджээ

Түүний гэр бүлийн гишүүдийн нийт орлогын хэмжээ нь 145 сая төгрөг.Тэрбээр 76 сая төгрөгийн үнэлгээ бүхий нийтийн орон сууц-1, 30 сая төгрөгийн үнэлгээ бүхий хурдан удмын 5 адуу,  107 сая төгрөгийн үнэт эдлэлтэй, хадгаламжиндаа 150 сая төгрөгтэй.2021 онд Батар Интернейшнл ХХК, Эко цаас ХХК, Монгол 999 Үндэсний нэгдэл ХК, Эрдэнэс Монгол ХК, Женко тур ХК, Баялгийн хувь ХК, Азхур ХХК, Экопак монгол ХХК, Монголын үнэт цаас хэвлэл ХХК, Мөнхийн үсэг ХХК-нд хувьцаа эзэмшдэг байна. Мөн тэрбээр 726 сая төгрөгийн зээлтэй хэмээн мэдүүлсэн байна.
Эрчим хүчний сайд Н.Тавинбэх нь 464 сая төгрөгийн үнэлгээ бүхий малтай

Түүний нийт орлогын хэмжээ 2020 онд 111 сая төгрөг байсан бол 2021 онд 29 сая төгрөг болж буурчээ. Харин гэр бүлийн гишүүдийн нийт орлогын хэмжээ нь 196 сая төгрөг аж.  Тэрбээр Эрдэнэс таван толгой ХХК ХХК, Эрдэнэс таван толгой ХК, Эрдэнэс таван толгой ХК, Разно импекс нэгдэл ХК, Эрдэнэс таван толгой ХК-ийн 1072ш, 1072ш, 1072ш, 51ш, 1072ш хувьцаа эзэмшдэг байна. 235 сая төгрөгийн үнэлгээ бүхий нийтийн орон сууц-3, 23 сая төгрөгийн үнэлгээ бүхий Hyundai, Sonata 7 маркийн суудлын жижиг машин нэгийг мэдүүлсэн байна. Түүнчлэн 21 сая төгрөгөөр үнэлэгдэх газартай ба 54 сая төгрөгийн хадгаламжтай, 270 сая төгрөгийн авлага,200 сая төгрөгийн зээлтэй.

55 сая төгрөгийн мотоциклтэй, автомашингүй Хөдөлмөр, нийгмийн хамгааллын сайд А.Ариунзаяа

Түүний нийт орлогын хэмжээ 36 сая төгрөг бол гэр бүлийн гишүүдийн нийт орлого нь 48 сая юм. Тэрбээр 646 сая төгрөгөөр үнэлэгдэх нэг граж, нэг орон сууц, 82 сая төгрөгийн үнэт эдлэл, хадгаламжиндаа 138 сая төгрөгтэй. Эрдэнэс таван толгой ХК, Эрдэнэс таван толгой ХК, Эрдэнэс таван толгой ХК, Эрдэнэс таван толгой ХК-ийн 1072ш, 535ш, 1072ш, 1072ш хувьцаа эзэмшдэг бөгөөд 100 сая төгрөгийн зээлтэй байна.

Эрүүл мэндийн сайд С.Энхболдын  гэр бүлийн гишүүдийнх нь орлого 4 сая төгрөг

Харин түүний жилийн орлого 30 сая төгрөг. Дансандаа 135 сая төгрөгтэй тэрбээр 320 сая төгрөгийн авлагатай, 70 сая төгрөгийн зээлтэй аж. 320 сая төгрөгөөр үнэлэгдэх 2 орон сууц, 98 сая төгрөгийн Ланд круйзер машинтай, 20 сая төгрөгийн үнэт эдлэлтэй.
Барилга хот, байгуулалтын сайд Б.Мөнхбаатар 650 сая төгрөгөөр үнэлэгдэх хоёр орон сууцтай

Түүний жилийн орлого 26 сая, гэр бүлийн орлого 122 сая төгрөг, нэг зуслангийн байшин, нэг үйлчилгээний обьект, нэг зогсоол, хоёр гражтай. Говь ХК, Эрдэнэс таван толгой ХК, Эрдэнэс таван толгой ХК, Эрдэнэс таван толгой ХК, Инжирийн үндэс ХХК, Их инжирийн үр ХХК, Прайм Лөүн ББСБ ХХК ХХК-иудад хувь эзэмшдэг ба 20 сая төгрөгийн Kia, SORENTO автомашинтай. 2020 онд 65 сая төгрөгийн үнэт эдлэлттэй байсан бол 5 сая болж буурчээ. Хадгаламждаа 45 сая төгрөгтэй, 205 сая төгрөгийн авлага, 10 сая төгрөгийн зээлтэй.

Батлан хамгаалахын сайд Г.Сайханбаяр 658 сая төгрөгөөр үнэлэгдэх нэг орон сууцыг эзэмшдэг

Тэрбээр 155 сая төгрөгөөр үнэлэгдэх Lexus, 570- 1, Lexus, RX 350 машинтай. Жилийн орлого нь 48 сая төгрөг бол гэр бүлийн орлого нь 73 сая төгрөг. 50 сая төгрөгөөр үнэлэгдэх газар, 45 сая төгрөгийн үнэт эдлэлтэй. Хадгаламждаа 19 сая төгрөгтэй, 125 сая төгрөгийн зээлтэй аж.
Хүнс, хөдөө аж ахуй, хөнгөн үйлдвэрийн сайд З.Мэндсайхан 2020 онд нийт 365 сая төгрөгийн үнэ бүхий малтай байсан бол 2021 онд нэг тэрбум 620 сая төгрөг болж нэмэгджээ

Түүний гэр бүлийн гишүүдийн нийт орлого нь 181 сая төгрөгөөс 372 сая төгрөг болж өссөн бөгөөд жилийн орлого 29 сая төгрөг гэж мэдүүлжээ. Тэрбээр 530 сая төгрөгийн үнэлгээ бүхий хоёр нийтийн орон сууц, гурван зуслангийн байшин, нэг гэр, нэг авто гражтай аж.. Мөн 10 сая төгрөгийн газар, 150 сая төгрөгийн үнэт эдлэлтэй. Дотоодын банканд 2020 онд 27 сая төгрөгийн хадгаламжтай байсан бол 2021 онд 29 сая төгрөг болж нэмэгдсэн байна.

Уул, уурхай, хүнд үйлдвэрийн сайд Г.Ёндон 17 сая төгрөгийн үнэтэй Toyota, Prius маркийн нэг автомашинтай

2020 онд нийт орлогоо 141 сая төгрөг хэмээн мэдүүлж байсан бол 2021 онд 31 сая төгрөг болж буурчээ. Мөн гэр бүлийн гишүүдийн нийт орлого нь 28 сая төгрөг байсан бол 2021 онд ямар ч орлогогүй болжээ. Тэрбээр нийт 460 сая төгрөг бүхий хоёр нийтийн орон сууцтай. 45 сая төгрөгийн газар, 30 сая төгрөгийн үнэт эдлэлтэй. Дотоодын банкны 26 сая төгрөгийн хадгаламжтай. 19 сая төгрөгийн авлагатай ба ямар ч зээлгүй аж.
Ерөнхий сайд Л.Оюун-Эрдэнэ 291 саяын орон сууцтай, 234 сая төгрөгийн жилийн орлоготой.

Түүний нийт орлогын хэмжээ нь 234 сая төгрөг бөгөөд гэр бүлийн гишүүдийн жилийн орлого нь 14 сая төгрөг аж. 291 сая төгрөгийн үнэлгээ бүхий нийтийн орон сууцтай тэрбээр Toyota, Highlander маркын 30 сая төгрөгийн үнэ бүхий авто машинтай. 2020 онд 114 сая төгрөгийн үнэ бүхий малтай байсан бол 2021 онд 187 сая болж өсчээ. Ерөнхий сайд хувьдаа 67 сая төгрөгийн үнэт эдлэлтэй, 93 сая төгрөгийн хадгаламжтай. Херо энтертайнмент групп ХХК, Хүлэг контент ХХК-д тус тус хувьцаа эзэмшдэг байна.

В.Цэнд-Аюуш