УИХ-ын гишүүн, Эрчим хүчний сайд Б.Чойжилсүрэн Дэлхийн банкны суурин төлөөлөгчийг хүлээн авч уулзлаа

Улсын их хурлын гишүүн, Эрчим хүчний сайд Б.Чойжилсүрэн энэ өдөр /2022.10.06/ мөн Дэлхийн банкны суурин төлөөлөгч Андрей Михнев, эрчим хүчний ахлах мэргэжилтэн Яанчин Сонг нарыг хүлээн авч уулзлаа.

Суурин төлөөлөгч Андрей Михнев эрчим хүчний сайд Б.Чойжилсүрэнд шинээр томилогдон ажиллаж буйд баяр хүргээд Дэлхийн банк нь Монгол Улсын хүнсний аюулгүй байдал, Эрчим хүчний найдвартай ажиллагааг дэмжих, сэргээгдэх эрчим хүчний арвин их нөөцийг ашиглах хүрээнд илүү анхаарал хандуулан ажиллаж байгааг онцлов.

Дэлхийн банк өнөөдрийн байдлаар “Эрчим хүч-2” төслийг хэрэгжүүлж байгаа төдийгүй “Эрчим хүч-3” төслийг эхлүүлэхэд шаардлагатай бүх баримт бичгийг боловсруулсан байна. Мөн эрчим хүчний салбарын “Мастер төлөвлөгөө”-г 2021 онд боловсруулж, танилцуулахад бэлэн болсон гэдгийг танилцууллаа.

Сайд Б.Чойжилсүрэн тогтвортой үргэлжилсэн хамтын ажиллагааг цаашид улам өргөжүүлэх, дэлхийн банкны орчин цагийн системийг Монгол Улсын эрчим хүчний салбарт нэвтрүүлэх, эх үүсвэр болон санхүүгийн нарийвчилсан судалгаа хийхэд хамтран ажиллах хүсэлтэй байгаагаа илэрхийлэв.

Талууд эдийн засгийн хүндрэлтэй цаг үед санхүүжилт тойрсон асуудлуудад авч хэрэгжүүлэх арга хэмжээг тодорхой болгож, эрчим хүчний салбарт хэрэгжүүлэх төсөл, арга хэмжээг эрэмблэх шаардлагатай гэдэгт санал нэгдсэн төдийгүй ойрын хугацаанд энэ асуудлаар уулзалтыг дахин зохион байгуулахаар боллоо.