АНУ өчигдрөөс /2023.VIII.01/ улайсдаг чийдэн зарж борлуулахыг хоригложээ. Тус улсын эрх баригчид 2007 онд анх энэ талаар шийдвэр гаргаж байсан бөгөөд үе шаттай ажил хийсний дүнд ийнхүү өчигдрөөс бүрмөсөн хориглосон байна. Судалгаагаар АНУ-ын айл өрхийн 50-иас дээш хувь нь лед гэрэлд шилжсэн нь тогтоогдсон тул эцсийн шийдээ гаргасан аж.
Үе шаттай ажил гэдэгт өнгөрсөн 16 жилийн турш гэрэлтүүлэгт тавих стандартыг шинэчилсэн зэрэг ажлууд багтаж байна. Хамгийн сүүлд Жо Байдены засаг заахиргаа Эрчим хүчний яамнаас тавьдаг стандартуудад “Чийдэнгийн шил нь нэг ватт тутамдаа 45 люмен ялгаруулж байх ёстой” гэсэн заалт оруулсан нь улайсдаг чийдэнг хэрэглээнээс хасах хууль эрхзүйн орчинг бүрдүүлжээ.
Люмен гэдэг нь чийдэнгийн гэрэлтүүлэх чадварыг хэмжих нэгж бөгөөд лед гэрэлтүүлэг нэг ватт тутамдаа 75 люмен ялгаруулдаг бол улайсдаг чийдэн нэг ватт тутамдаа 15 люмен ялгаруулдаг аж.
АНУ эрчим хүчний хэмнэлттэй, үр дүн өндөр лед гэрэлтүүлэгт шилжсэнээр хэрэглэгчид мөнгөө хэмнэхээс гадна хүлэмжийн хийг 30 жилийн хугацаанд 222 сая тоноор бууруулахад хувь нэмрээ оруулна гэж Эрчим хүчний яамнаас нь мэдэгджээ.
Хориг хэрэгжиж эхэлснээр, ватт тутамдаа 45-аас бага люмен ялгаруулдаг чийдэнг хориглож байгаа бөгөөд энэ нь улайсдаг чийдэн юм. Гэхдээ зөвхөн зарж борлуулахыг хориглосноос, нэгэнт авсан чийдэнгээ хэрэглэхийг хориглоогүй. Учир нь, улайсдаг чийдэнгийн ашиглалт угаас бага буюу нэг жил орчим байдаг аж.
ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэл бичигдээгүй байна