Т.Баярмаа: УБЕГ -аас зарласан хугацаанд санал гомдол ирүүлээгүй 34 мянган хуулийн этгээдийг татан буулгасан

Сайн байна уу та. Татагдан буугдсан ААН-үүдийн жагсаалт гарсан байсан. Ямар шалгуураар ААН-үүдийг татан буулгасан бэ?

Хуулийн этгээдийн улсын бүртгэлийн тухай хуулийн 26 дугаар зүйлд Санхүүгийн тайлангаа найм ба түүнээс дээш улирал дараалан гаргаагүй, харилцагч санхүүгийн байгууллагад илгээж баталгаажуулаагүй хуулийн этгээдийг улсын бүртгэлээс хасах талаар санхүү, төсвийн асуудал эрхэлсэн төрийн захиргааны төв байгууллагын саналыг үндэслэн улсын бүртгэлийн байгууллага өөрийн цахим хуудсаар нийтэд зарлах бөгөөд зарласнаас хойш 6 сарын дотор бичгээр санал, гомдол гаргаагүй, дампуурлын хэрэг үүсгээгүй, санхүүгийн тайлангаа гаргаагүй, шүүхийн шийдвэрээр тогтоогдсон өр, төлбөргүй бол уг хуулийн этгээдийг улсын бүртгэлээс хасна. гэсэн заасан байдаг.

Өнгөрсөн оны аравдугаар сарын 28-ны өдөр УБЕГ-аас дээрхи заалтад үндэслэн татагдан буугдах хуулийн этгээдүүдийг зарласан. Уг хугацаанд үүсгэн байгуулагч нь санал гаргаагүй 34377 хуулийн этгээдийг 2023 оны долдугаар сард татан буулгаж, жагсаалтыг гаргасаны дагуу татварын алба татвар төлөгчийн бүртгэлээс хасалтыг хийсэн.

Татвар төлөгч  өөрийн хүсэлтээр ААН-ээ татан буулгаж болдог уу?

Болно. ААН, хуулийн этгээдийг үүсгэн байгуулсан иргэн үйл ажиллагаа явуулахаа больсон эсхүл, өөр шалтгаанаар татан буулгах хүсэлтийг гаргаж болно. Ингэхийн тулд харьяа татварын албандаа хүсэлт гаргана.  Татвар төлөгч хүсэлт гаргасны дагуу татварын алба эрсдэл тооцож, эрсдэлтэй тохиолдолд хяналт шалгалтад хамруулан, татварын өр, илүү үлдэгдэлийг  хуулийн дагуу шийдвэрлэж,  татвар төлөгчийн хасалтын картыг бүртгэн УБЕГ-т хүргүүлдэг.  Товчхондоо үүсгэн байгуулсан ААН-ээ татан буулгахад татварын үлдэгдэлгүй  байх нь чухал.

Цаашдаа ч 8 улирал дараалан үйл ажиллагаа явуулаагүй гэдгээр татан буулгасаар байх уу?

 Хуулийн этгээд үүсгэн байгуулна гэдэг иргэний хариуцлага бөгөөд нэгэнт үүсэн байгуулсан бол хуулийн дагуу үйл ажиллагаа явуулж, татвар болон санхүүгийн тайлангаа тогтмол илгээж байх үүрэгтэй.

Санхүүгийн тайлангаа найм ба түүнээс дээш улирал  дараалан гаргаагүй, УБЕГ-аас зарлагдсан 6 сарын хугацаандаа гомдол, санал гаргаагүй, дампуурлын хэрэг үүсгээгүй, санхүүгийн тайлангаа гаргаагүй, шүүхийн шийдвэрээр тогтоогдсон өр, төлбөргүй бол татан буугдана.

Саяхан татварын скорингийг үйлчилгээндээ нэвтрүүлсэн байсан. Үүний чухал нэг үзүүлэлт нь бүртгэлийн асуудал байсан. Татвар төлөгчид бүртгэлтэй холбоотойгоор ямар зөвлөгөө өгөх вэ?

Монгол Улсын Засгийн газраас төрийн үйлчилгээг цахимжуулахтай холбоотойгоор төрийн бүхий л чиг үүрэг, үйлчилгээ эрчимтэй цахимд шилжиж байна. Мөн мэдээлэл солилцоо сайжирч, иргэдийн цаг завыг хэмнэх болсон. Нөгөө талдаа гарч байгаа хүндрэл нь төрийн байгууллагууд тусдаа бүртгэлтэй, иргэдийн мэдээлэл зөрүүтэй байх тохиолдоос болж, иргэдэд хүндрэл бэрхшээл тулгарах тохиолдол гарч байна. Тиймээс төрийн байгууллагуудад байгаа мэдээллээ иргэн өөрөө засч, үнэн зөв болгоход анхаарвал өөрт нь цахим үйлчилгээ авахад ямар нэг хүндрэл гарахгүй.

Татварын албанд байгаа татвар төлөгчийн мэдээлэл тухайн татвар төлөгчид нээлттэй байх ба мэдээллийн үнэн зөвийг татвар төлөгч өөрөө хариуцдаг. Тийм учраас мэдээллээ үнэн зөв байлгахад анхаарч, өөрчлөлт орсон бол тэр даруйд нь засч байхад анхаараарай. Ингэснээр татварын албанаас цаг алдалгүй мэдээллээ авч, хуулиа хугацаандаа биелүүлж чадна.

Мөн татвар төлөгчид эдийн засгийн аль чиглэлд үйл ажиллагаа эрхэлж байгаагаа татварын албандаа мэдээлвэл эдийн засгийн салбараас хамаарч ялгаатай хэрэгждэг татварын хөнгөлөлт, чөлөөлтөд хамрагдах боломжоо нэмэгдүүлэх боломжтой.

 Бүртгэлийг ЭНД дарж харна уу