Ц.Баасандамба: Талийгаачийн ар гэртэй байнгын холбоотой байж, бүх талын тусламж дэмжлэг үзүүлж байна

Баянгол дүүргийн 22-р хороонд нэгдүгээр сарын 23-24-нд шилжих шөнө нэг гэр бүлийн зургаан хүн угаартсан шинжтэй нас барсан харамсалтай хэрэг гарсан. Үүнтэй холбогдуулан тус хорооны Засаг дарга Ц.Баасандамбаас утсаар тодруулга авлаа.

-Танай хороонд нэг гэр бүлийн зургаан хүн угаартаж, нас барсан харамсалтай хэрэг гарсан. Уг нь төрийн байгууллагууд айл өрхөөр явж угаарын хийнээс урьдчилан сэргийлэх арга хэмжээ авч байна гэсэн мэдээлэл гарч байсан. Тухайн айлаар орсон юм болов уу?

-Ар гэрийнхэнд нь гүн эмгэнэл илэрхийлж байна. Манай хороонд угаарын хийнээс урьдчилан сэргийлэх чиглэлээр холбогдох бүх байгууллагууд хамтран хяналт шалгалт хийдэг. Манай хорооны сайжруулсан түлш хэрэглэдэг бүх айлаар холбогдох төрийн байгууллагууд 2024 оны 9 сараас хойш дөрвөн удаа орж хяналт шалтгалт хийсэн.

Хамгийн сүүлд буюу нэгдүгээр сарын 18-19-ний өдрүүдэд нийслэлийн хэмжээнд зохион байгуулсан шалгалтаар тухайн айлд НОБГ-ын хоёр алба хаагч, хэсгийн ахлагчтай хамт орж угаарын хийнээс урьдчилан сэргийлэх заавар зөвлөмж өгч, угаарын хийн мэдрэгч төхөөрөмжийг шалгасан юм билээ. Тэгэхэд дамжуулагчтай угаарын хий мэдрэгч төхөөрөмж хэвийн ажиллаж байсан гэж судалгаанд бүртгэгдсэн байсан.

Хохирогчийн ар гэрээс өнөөдөр мэдээлэл хийлээ. Та бүхэн хохирогчийн ар гэрийнхэнтэй холбоотой байгаа юу. Юунаас болж ийм харамсалтай хэрэг гарсан юм бол?

 -Дүүрэг, орон нутгийн зүгээс байнга холбоотой байж шаардлагатай бүх арга хэмжээг авч ажиллаж байгаа. Мөн хохирогчийн ар гэрийнхэнтэй байнгын холбоотой байж, бүх талын тусламж дэмжлэг үзүүлж байна. Цагдаагийн байгууллага шалгаж байгаа учраас бидний хувь илүү дэлгэрэнгүй мэдээлэл өгөх боломжгүй.