Бусдыг тагнаж, чагнасан хэргээр саатуулагдсан З.Төрмандахын бие муудаж эмнэлэгт хүргэгджээ

Ухаа худагтай холбоотой асуудлаар Эм Си Эс группийн нэр бүхий хүмүүсийг саатуулан шалгаж байгаа талаар бид өмнө нь мэдээлсэн. 

Тэгвэл тус хэрэгт холбогдуулан саатуулагдсан гэх З.Төрмандахын бие муудаж, эмнэлэгт хүргэгджээ. Одоогоор эмнэлэгт хэвтэн эмчлүүлж байгаа гэх мэдээлэл байна. Эх сурвалжийн мэдээлснээр З.Төрмандах нь өчигдөр тагнуулын ерөнхий газарт очиж мэдүүлэг өгчээ. 

З.Төрмандах болон саатуулагдсан дөрвөн иргэн нь эрүүгийн хуулийн 19.11 дүгээр зүйл, 21.13 дугаар зүйлээр шалгагдаж, байна. Эдгээр зүйл анги нь зургаан сараас гурван жил хүртэлх хугацаагаар хорих ялтай.

• 19.11 дүгээр зүйл.Төрийн нууцыг хууль бусаар олж авах 1.Төрийн нууцад хамаарах мэдээ, баримт, эд зүйлсийг хулгайлсан, цуглуулсан, хадгалсан нь эх орноосоо урвах, тагнуул хийх гэмт хэргийн шинжгүй бол зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.
• 21.13 дугаар зүйл.Гүйцэтгэх ажлын тухай хууль зөрчих 2.Гүйцэтгэх ажил явуулах эрхгүй этгээд гүйцэтгэх ажил явуулсан, эсхүл гүйцэтгэх ажлын тусгай техник олж авсан, ашигласан, борлуулсан бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар хорих ял шийтгэнэ.

Нийслэлийн прокурорын газраас яллагдагч З.Т-г “Төрийн нууцад хамаарах мэдээ, баримт, эд зүйлсийг хулгайлсан, цуглуулсан, хадгалсан”, “Гүйцэтгэх ажил явуулах эрхгүй этгээд гүйцэтгэх ажил явуулсан, эсхүл гүйцэтгэх ажлын тусгай техник олж авсан, ашигласан, борлуулсан” гэмт хэрэгт холбогдуулан яллагдагчаар татжээ. 

Шүүх хэргийн материалд цугларсан нотлох баримтууд, шүүхийн хэлэлцүүлэгт гаргасан прокурорын санал, яллагдагчийн өмгөөлөгч нарын тайлбар зэрэгтэй танилцан яллагдагч З.Т-д яллагдагчаар цагдан хорих таслан сэргийлэх арга хэмжээ авах тухай прокурорын саналыг хүлээн авах үндэслэлтэй гэж дүгнэн, түүнд 2025 оны 2 дугаар сарын 19-ний өдрөөс цагдан хорих таслан сэргийлэх арга хэмжээ авч шийдвэрлэсэн байна.